Ƀơi mông jơnum, ơi Nguyễn Minh Chí, Kơ-iăng khua gơnong bruă hmua hăng pơđĭ kyar ƀôn lan tơring čar Dak Lăk pơsit: 52 ring bruă ia yua hơdjă ƀơi plơi pla pơdơi mă yua hăng lu ring bruă pơkŏn glăk mă yua mơ̆ng 20-40% đôč mơ̆ Gong phun pơtui jua pơhiăp Việt Nam lăi glăi lĕ sit yơh. Phun ñu lĕ yua hơdôm ring bruă anai hơmâo pơkra sui laih, anet đôč, hơmâo jao kơ Jơnum min mơnuih ƀôn sang hơdôm boh să ƀudah jao glăi kơ grup wai lăng plơi pla lăng mă pô; mă yua samơ̆ ƀu thâo đơi ôh. Bruă ming pơkra ƀu hơmâo ngă ôh, pioh lui soh đôč.

Tơdơi kơ hmư̆ pô pơ ala mơ̆ng anom bruă hmua lăi pơthâo, ơi Nguyễn Tuấn Hà, Kơ-iăng khua Jơnum  min mơnuih ƀôn sang tơring čar Dak lăk git gai Gơnong bruă hmua hăng pơđĭ kyar ƀôn lan, Jơnum min mơnuih ƀôn sang hơdôm boh tơring khŏm lăng glăi abih anih mơnuih ƀôn sang kơƀah ia hơdjă yua ring bruă răm hĭ đah mơ̆ng pơkra glăi, tañ brơi ia yua kơ mơnuih ƀôn sang, biă ñu lĕ amăng hrơi blan adai không phang kơtang.