Tui hăng tơlơi pơhing ƀơi mông jao bruă, rơnoh prăk man pơdong 1.200 boh sang pioh brơi kơ sang anŏ ƀun rin him lăng abih tih 96 klai prăk. 4 boh sang bruă prăk kah hăng Agribank, Vietcombank, Vietinbank hăng BIDV jao brơi laih 60 klai prăk, rơnoh dŏ glăi yua tơhan kông an pơčruh djru hrŏm.

Nao jơnum hrŏm hăng đĭ pơhiăp ƀơi mông jơnum, Thượng tướng, ơi Lương Tam Quang, Kơ-iăng khua Ding jum kông an, bơni kơ hơdôm boh sang bruă djru prăk kăk pioh man pơdong sang brơi kơ sang anŏ ƀun rin tơnap tap ƀu hơmâo sang dŏ ƀơi tơring čar Dak Lak. Thượng tướng, ơi Lương Tam Quang bơni kơ tơhan kông an tơring čar hăng gong gai kơnuk kơna djop plơi pla amăng tơring čar kơnong ƀiă hrơi blan đôč hơmâo man pơdong giong laih 2 boh sang ngă gru pioh jao kơ sang anŏ ƀun rin tơnap tap ƀơi tơring glông Čư̆ Mgar hăng rơkâo kông an Dak Lak, hơdôm anom bruă man pơdong ăt pok pơhai man pơdong 1.198 boh sang dŏ glăi, kiăng man pơdong djơ̆, kjăp hăng khom giong hlâo kơ lơ 31/10 thun anai.