Thun 2023 hăng pran jua gơgrong kơtang hloh, ƀing khua mua hơmâo pơgiong lu bruă hloh, anai lĕ tal blung a amăng 78 thun mă bruă amăng Ƀirô Khua pơ ala mơnuih ƀôn sang dêh čar hơmâo pơphun lu tal jơnum amăng ha thun hăng 5 tal jơnum. Bruă krăo lăng hơmâo kơtưn hăng pơplih phrâo, jai hrơi hơdeč hmar, tañ ƀiă dong hăng djơ̆ tơlơi sit nik. Ƀirô Khua pơ ala mơnuih ƀôn sang dêh čar hmao tlôn ba tơbiă lu hơdră bruă yôm phăn amăng dêh čar. Amăng mông jơnum ƀing pơ ala brơi khul Khua pơ ala mơnuih ƀôn sang lăng glăi bruă mă mơng Ƀirô Khua pơ ala mơnuih ƀôn sang dêh čar  tal blung a pơphun jơnum klah čun tơdơi kơ 1 thun mă bruă. Yă Lý Thị Lan, Kơ-iăng Khua khul Khua pơ ala mơnuih ƀôn sang tơring čar Hà Giang brơi thâo:

“Hrŏm hăng tơlơi pơplih phrâo hrưn đĭ klă dong amăng bruă mă mơng anom bruă pơ ala mơnuih ƀôn sang, ƀing Khua pơ ala mơnuih ƀôn sang ƀơi hơdôm boh tơring čar hok mơ-ak biă mă yua anai lĕ tal blung a amăng rơwang mă bruă mơng Khua pơ ala mơnuih ƀôn sang dêh čar tal 15, hơmâo pơphun jơnum klah čun lăng glăi bruă mă amăng ha thun mơng khhua mua. Tui kâo pơmĭn, anai lĕ tơlơi gal hăng amra hơmâo dong tơlơi pơplih kiăng pơdah tơlơi đing nao mơng Ƀirô Khua pơ ala mơnuih ƀôn sang dêh čar , Jơnum min apăn bruă Khua pơ ala mơnuih ƀôn sang hăng bruă mă mơng khua mua pơ ala mơnuih ƀôn sang  kiăng dưi gum pơgôp, pơgiong djơ̆ tơlơi rơkâo, bruă jao, hrưn đĭ klă dong bruă mă mơng ƀing khua mua ƀơi hơdôm boh ƀon lan”.

Pơgôp hiăp amăng jơlan gah pok pơhai bruă jao thun 2024, Khua čih pioh, Khua anom bruă Ƀirô Khua pơ ala mơnuih ƀôn sang ơi Bùi Văn Cường hơmâo tơlơi rơkâo hăng khua mua hơdôm boh tơring čar, ƀôn prong:

“Tŏ tui gum hrŏm kjăp kiăng pơphô bruă djru Jơnum min apăn bruă Khua pơ ala mơnuih ƀôn sang dêh čar git gai, črâo ba mă bruă amăng anom bruă djuai ania, hơdôm jơnum min mơng Ƀirô Khua pơ ala mơnuih ƀôn sang amăng bruă krăo lăng, anăm brơi lok nao lok rai bruă hyu pel ĕp ƀơi hơdôm anom bruă. Hăng hơdôm boh ƀon lan hơmâo grup hyu mă bruă rơgao mrô pơkă, rơkâo Khul Khua pơ ala mơnuih ƀôn sang lăi pơthâo brơi Khul čih pioh kơ bruă grup hyu mă bruă, boh tơhnal mă bruă, mơnuih hyu mă bruă, hrơi mông mă tong ten ƀơi ƀon lan kiăng lăi pơthâo brơi Jơnum min apăn bruă Khua pơ ala mơnuih ƀôn sang dêh čar hmao tlôn tơlơi pơplih lăp djơ̆”.

Đĭ pơhiăp pơđut mông jơnum, Khua git gai pơ ala mơnuih ƀôn sang dêh čar ơi Vương Đình Huệ lăng thun 2023 lĕ thun lu bruă mă hloh. Hơdôm khul grup hăng ƀing Khua pơ ala mơnuih ƀôn sang ăt ngă tui bruă čih pơkra tơlơi phiăn pran gơgrong, krăo lăng tŭ yua hăng hmao tlôn, ngă tui pran gơgrong kơtang hloh amăng bruă čih pơkra tơlơi phiăn, tơlơi pơtrun hơdôm bruă yôm phăn amăng lŏn ia hăng bruă krăo lăng, bưp mơnuih ƀôn sang, kiăo tui lăng, pơtrut pơsur pơsir hĭ hơdôm hră ƀôm kiơng mơng mơnuih ƀôn sang.

Pơ anăp anai, Khua git gai pơ ala mơnuih ƀôn sang dêh čar ơi Vương Đình Huệ rơkâo, ƀing khul Khua pơ ala mơnuih ƀôn sang, rĭm čô khua mua kiăng ngă tui boh than dưi ngă, tŏ tui pok prong, hơmâo lu dong bruă mă, hrưn đĭ klă dong amăng bruă mă mơng Khua pơ ala mơnuih ƀôn sang. Sit biă ñu, tŏ tui hruă kjăp tơlơi gơgrong yôm phăn mơng Khua pơ ala mơnuih ƀôn sang dêh čar amăng bruă pơphun hăng ngă bruă mơng Ƀirô Khua pơ ala mơnuih ƀôn sang dêh čar Việt Nam lăi hrŏm. Amăng anun, bruă jao prong hloh mơng khua mua lĕ pơphun kiăng khua pơ ala mơnuih ƀôn sang pơbưp hăng mơnuih ƀon lan:

“Tơlơi gơgrong, bruă jao lĕ pơphun bưp mơnuih ƀôn sang, gum hrŏm, pơhlôm brơi gêh gal kiăng Khua pơ ala mơnuih ƀôn sang dêh čar bưp mơnuih ƀon lan. Anai lĕ bruă jao blung a hăng yôm phăn hloh, yua anun lơm aka ƀu pơplih pơkra tơlơi pơtrun kơ bruă bưp mơnuih ƀôn sang amăng hơdôm črăn amăng tơlơi pơtrun ră anai, rơkâo ƀing khua tŏ tui gum hrŏm kjăp hăng Jơnum min djop djuai ania mơnuih mơnam, tui tơlơi git gai mơng gưl Ping gah kiăng tŏ tui pơplih phrâo amăng bruă pơbưp hăng mơnuih ƀôn sang. Amăng tơlơi phiăn ră anai hơmâo tơlơi pơkă brơi khua mua bưp mơnuih ƀôn sang tui jơlan hơdră mơng Khul Khua pơ ala mơnuih ƀôn sang mơ ƀu hơmâo tơlơi pơkă lĕ ƀing Khua pơ ala mơnuih ƀôn sang bưp mơnuih ƀôn sang tui hluai hơjăn, tui tơlơi gơgrong mơng khua mua, anai lĕ aka ƀu pơkă črâo ba tong ten bruă anai. Pơ anăp anai amra kơsem min pơgiong tơlơi pơtrun kơ bruă bưp mơnuih ƀôn sang, khŏm pơsir hĭ tơlơi gun anai”.

Khua git gai pơ ala mơnuih ƀôn sang dêh čar ơi Vương Đình Huệ pơtă, ƀing khua mua gum hrŏm hăng anom bruă djuai ania hăng hơdôm Jơnum min mơng Ƀirô Khua pơ ala mơnuih ƀôn sang dêh čar krăo lăng ƀơi ƀôn lan; kiăo tui lăng, pơtrut pơsur bruă pơsir hĭ hră ƀom kiơng, rơkâo đĭ mơng mơnuih ƀôn sang, rơkâo djop anom bruă bơdjơ̆ nao lăi pơthâo kơ bruă anai; laih dong kiăng lăi pơthâo bruă mă mơng Khua pơ ala mơnuih ƀôn sang./.