Pơhiăp pơđut jơnum, Khua git gai pơ ala mơnuih ƀôn sang dêh čar, ơi Vương Đình Huệ brơi thâo, tơdơi kơ 1 hrơi mă bruă hur har.

Khua git gai pơ ala mơnuih ƀôn sang dêh čar bơni kơ khul pơ ala mơnuih ƀôn sang djop tơring čar hơmâo djru hrŏm lu biă mă boh tơhnal tŭ yua kơ lŏn ia, kơ bruă bơwih ƀong huă, mơnuih mơnam ƀơi tơring čar, plơi pla; lăi pơtong, tơdah thun 2022 kah hăng hơmâo glông angin rơ-ơ̆ pruih ia hiam phrâo amăng bruă mă khul pơ ala mơnuih ƀôn sang djop gưl truh ră anai dưi pơtong sit, glông angin pưh nao anun, angin rơ-ơ̆ hiam pơlar prong, bang bơngač lu, boh tơhnal klă hiam hăng bơkơnar hloh.

Bruă mă mơ̆ng khul pơ ala mơnuih ƀôn sang djop gưl jai hrơi mă bruă tŭ yua, djơ̆ lăp, djru hrŏm prong biă mă ngă tui bruă jao bơwih ƀong huă mơnuih mơnam. Hơdôm tơring čar ngă klă bruă pơ ala mơnuih ƀôn sang lĕ pơhrui prăk duh jia kơ kơnuk kơna lu hăng pơđĭ kyar hmar. Jơnum min pơ ala mơnuih ƀôn sang djop tơring čar hơmâo ngă tui djơ̆ tơlơi phiăn dêh čar, pok pơhai hơdôm bruă čih pơkra tơlơi phiăn, čih pơkra tơlơi pơkă, pơtrun kơ bruă mă, plĕ hră đăo kơnang ƀing khua gong gai; ngă klă bruă ba yua mrô, pơtom hiăp, hơmâo lu tơlơi pơblih phrâo hiam mơak amăng bruă mă, boh nik ñu rim wơ̆t jơnum lok ƀing pơ ala mơnuih ƀôn sang, bruă mă mơ̆ng djop khul gru sa hnong bruă, pơphun bruă pơ ala mơnuih ƀôn sang jai hrơi lăng yôm; bruă tŭ jum ană plơi pơsir tơlơi ƀŏm kiơng, pơsir tơlơi rơkâo mơ̆ng mơnuih plĕ hră klă hloh, ngă bruă pơkơjăp tui hăng pơmin nao yua anŏ pơđĭ kyar ƀơi tơring čar; bruă mă pôr tơlơi pơhing ăt dưi đing nao lu mơ̆n.

Kiăng dưi ngă boh tơhnal anai, tui hăng Khua git gai pơ ala mơnuih ƀôn sang dêh čar, ơi Vương Đình Huệ, khul pơ ala mơnuih ƀôn sang djop gưl hơmâo ngă tui djơ̆ tơlơi pơčrâo ba, git gai mơ̆ng ping gah, djơ̆ tui hră pơtrun mơ̆ng Gơnong dlông, anom bruă pơ ala mơnuih ƀôn sang dêh čar, Kơnuk kơna; tơlơi đing nao git gai mơ̆ng Gơnong dlông, Kơnuk kơna. Biă mă ñu, khua mua pơ ala mơnuih ƀôn sang hơmâo čih pơkra hră pơtrun kơ bruă mă, ngă atur tơlơi phiăn, hră pơtô ba pioh pơblih phrâo bruă mă krăo lăng mơ̆ng khul pơ ala mơnuih ƀôn sang dêh čar, pơ ala mơnuih ƀôn sang djop gưl. Hơdôm tơlơi dŏ gun mơ̆ng khul pơ ala mơnuih ƀôn sang tơring čar, dưi hơmâo Khua mua jơnum min apăn bruă phun pơ ala mơnuih ƀôn sang dêh čar lăi glăi hăng hră pơar, pơblang tong ten hăng djop djel. Hrŏm hăng anun, tơlơi ĕp lăng kơsem min, pơblih phrâo mơ̆ngƀing ding kơna, khul grup amăng anom bruă pơ ala mơnuih ƀôn sang; bruă ngă hơdai gum hrŏm tong ten plah wah gong gai kơnuk kơna hăng ƀing pơ ala mơnuih ƀôn sang mơ̆ng anom bruă kơnuk kơna, ngă hrŏm tong ten djop khul grup amăng sang bruă pơ ala mơnuih ƀôn sang  tơring čar, djop anom bruă mơ̆ng sang bruă khua pơ ala mơnuih ƀôn sang dêh čar.....

Hrơi blan pơ anăp adih, Khua git gai pơ ala mơnuih ƀôn sang dêh čar ơi Vương Đình Huệ rơkâo, khul pơ ala mơnuih ƀôn sang dêh čar khom kiăo tui djơ̆ hăng tơlơi git gai mơ̆ng djop anom bruă ping gah, khua mua phun anom bruă ping gah amăng khul pơ ala mơnuih ƀôn sang djop gưl, anai yơh anŏ pơsit yôm truh bruă mă kiăng ngă tui djơ̆ tơlơi dưi jao, bruă mă phun ta pô.

“Ƀing gơmơi rơkâo ăt kơtưn ngă tui bruă mă mơ̆ng tơlơi dưi mơnuih ƀôn sang kơnang ngă pô krăo lăng ƀơi tơring čar tui hăng tơlơi phiăn pơkă pioh ngă giong klă bruă jao amăng thun 2024. Amăng anun, ăt jŭ yap glăi, ngă giong djop hră pơtrun ƀơi tơring čar. Mơ̆ng anun bruă mă sit nik mơ̆ng khul pơ ala mơnuih ƀôn sang dưi pơgôp hrŏm lu hloh, jĕ giăm, tong ten hăng glăm ba sit nik amăng bruă čih pơkra tơlơi phiăn hăng hră pơtrun kơ bruă mă, boh nik ñu hơdôm tơlơi phiăn pơdjơ̆ nao tơlơi hơdip mơda, bơwih ƀong huă mơnuih mơnam tơring čar. Amăng thun anai hơmâo lu hră pơtrun hơmâo anŏ gơgrong phara amra dưi sem glăi hăng čih pơkra ngă tui. Gơmơi rơkâo khul pơ ala mơnuih ƀôn sang djop gưl, lăng nao kơ tơlơi phiăn pơkă, Hră pơtrun hơmâo pơsit laih pioh pơkra hơdră, akŏ bruă pok pơhai djơ̆ lăp, tong ten, boh nik ñu tơlơi phiăn lŏn mơnai ƀudah lŏn tơnah thun 2024  ta juăt lăi, Tơlơi phiăn sĭ mơdrô lŏn sang đang hmua, Tơlơi phiăn sang dŏ, Tơlơi phiăn Kông ngăn ia yua, Tơlơi phiăn kăn kươk, Tơlơi phiăn tơhan mut ngă hrŏm pơgang tơlơi rơnuk rơnua pơ plơi pla….Amăng hơdôm mơta tơlơi phiăn anun hơmâo lu boh yôm phun tong ten  jao kơ tơring čar”.

Lăi pơtong khom pơblih phrâo ngă tui sit nik amăng tơlơi hơdip mơda mơ̆ng tơlơi phiăn, hră pơtrun yua khua pơ ala mơnuih ƀôn sang dêh čar pơsit, Khua pơ ala mơnuih ƀôn sang dêh čar rơkâo, khul pơ ala mơnuih ƀôn sang djop gưl khom ngă tui mơtam mơ̆ng ră anai, amăng anun hơmâo Hră pơtrun kơ 3 hơdră bruă tơhnal pơkă mơ̆ng dêh čar. Pơ anăp anai, khua mua pơ ala mơnuih ƀôn sang dêh čar jơnum jŭ yap glăi djop mơta hră pơar či ngă, yua kơ anun, khul pơ ala mơnuih ƀôn sang djop gưl kiăng jŭ yap glăi abih bang hơdră ngă hră pơar amăng kơnuk kơna, lui hĭ hơdôm hră pơar ƀu gêh găl, lu črăn đơi ƀu kiăng dơ̆ng tah, laih dơ̆ng jŭ yap glăi bruă tuh pơ alin kơ bruă čar.

Khua git gai pơ ala mơnuih ƀôn sang dêh čar pơtă pơtăn, khul pơ ala mơnuih ƀôn sang dêh čar khom pơblih phrâo amăng bruă mă, hơmâo pơblih phrâo amăng mông jơnum lok yơh phun, đing nao khul pơ ala mơnuih ƀôn sang ƀơi tơring glông, laih anun truh pơ să; pơtrut bruă mă bơkơtưn nao rai; pơđĭ tui boh tŭ yua bruă mă mơ̆ng ƀing pơ ala mơnuih ƀôn sang djop gưl, đing nao bruă pơtô hrăm, čung ba; kơtưn amăng bruă pơsir hră pơar ană plơi pla ƀom kiơng hăng pơthâo đĭ, boh nik ñu lu kơđi tơlơi hlăk hơmâo hmư̆ hing ƀu klă, mơnuih ƀôn sang ƀom kiơng lu mơnuih, tơnap tap, laih dơ̆ng khom pơblih phrâo bruă mă nao bưp mơnuih ƀôn sang plĕ hră ruah khua.