Plĕ hră ruah khua - hrơi mơak prong mơ̆ng tơlơi pơmin pran jua ană plơi pla, jing gai pơkă brơi djŏp mơta bruă mă mơ̆ng mơnuih ƀôn sang ngă pô, jing phun atur kiăng akŏ pơdong sa Kơnuk kơna hơmâo tơlơi phiăn kjăp kơtang, mơnuih mơnam dưm kơnar, thâo rơgơi. Anai jing mông tơlơi dưi ngă pô mơ̆ng mơnuih ƀôn sang hơmâo pơƀuh rơđah hloh, pơsit hăng bruă ngă tong ten amăng rim pok hră nao plĕ. Nai prin tha, nai tha prin Nguyễn Minh Đoan, nai pơtô sang hră Đại học Luật Hà Nội lăi: Hăng bruă ruah khua, mơnuih ƀôn sang dưi pơsit hơdôm bruă yom mơ̆ng lŏn ia hăng amăng tơring; gum wai lăng mơ̆ng ataih djŏp bruă kơnuk kơna hăng mơnuih tơpuôl kiăo tui anom bruă pơ ala yua gơñu ruah đĭ: “Anai jing hrơi mông mơnuih ƀôn sang pơƀuh tơlơi dưi mơ̆ng ƀing ñu hăng bruă ruah mă mơnuih rơgơi mơbruă, thâo pơmin, ƀudah ta juăt lăi jing mơnuih kơhnâo kơhnăk hloh amăng anih, djŏp bruă mă či mut ngă bruă tom anom bruă pơ ala brơi mơnuih ƀôn sang. Laih anun lơ̆m ñu sit nik bơdjơ̆ nao tơlơi gêh gal ƀu djơ̆ kơnong lŏn ia ta đôč ôh mơ̆ rim čô mơnuih mơtăm, lơ̆m anun mơnuih ƀôn sang ƀuh bruă nao plĕ hră ruah khua jing hrơi mơak prong samơ̆ ăt jing bruă ngă sit nik mơn”.

Bruă ruah khua pơ ala mơnuih ƀôn sang dêh čar tal 16 hăng khua pơ ala mơnuih ƀôn sang djŏp gưl rơwang thun 2026-2031 pơphun amăng hrơi mông lŏn ia mut amăng rơwang thun glăk đĭ kyar. Aka ƀu hơmâo djơ̆ ôh Việt Nam dong ƀơi anăp lu tơlơi gêh găl tui ră anai: tơlơi hmư̆ hing, kơdrưh lŏn ia ta hăng jar kmar hơmâo đĭ tui mơn; tơlơi kơtưn pơdrong sah, kjăp kơtang jing pơtrut pơsur pran jua kơtang biă; boh thâo - ia rơgơi, pơplih boh thâo mrô, bơwih ƀong mơtah, bơwih ƀong mrô pok rai anih đĭ kyar phrâo, pơplih bruă wai lăng dêh čar hơmâo pơƀuh rơđah rơđông.

Amăng hrơi mông anun, bruă ruah khua tal anai ƀu kơnong yom kơ rơwang bruă 5 thun đôč ôh, ăt jing tơlơi ruah mă kơ jơlan nao mơ̆ng lŏn ia, kơ anŏ klă bruă wai lăng dêh čar, kơ rơnoh pơkă dưi ngă tơlơi kơtưn đĭ kyar amăng lu thun tŏ tui dong. Tui hăng Nai prin tha Nguyễn Viết Chức - Kơiăng khua hơđăp Jơnum min Gru grua, Pơtô hrăm, Hlăk ai čơđai muai mơ̆ng Ƀirô khua pơ ala mơnuih ƀôn sang dêh čar, amăng mông anun khŏm kiăng rim čô mơnuih thâo hluh rơđah tơlơi hơdip kơgi kơdih mơ̆ng dêh čar hăng tơlơi đĭ kyar mơ̆ng lŏn ia ta nao hrŏm hăng tơlơi ruah mă mơ̆ng ƀing ta: “Ƀing ta glăk mut amăng rơnuk khŏm ngă tui tơlơi kơtưn tơlơi kiăng khăp mơ̆ng djuai ania, truh thun 2045 jing sa boh dêh čar đĭ kyar. Jing ba tơbiă tơlơi kiăng ngă prong hăng khŏm kiăng ƀing khua pơ ala khŏm rơgơi mơbruă, thâo pơmin, hur har tuh rơyuh pran jua bơwih brơi mơnuih ƀôn sang ăt khŏm phara hloh mơn. Laih dong mơnuih ƀôn sang jai hrơi thâo hluh tơlơi gơgrong bruă hăng tơlơi gêh găl mơ̆ng pô lơ̆m nao plĕ hră. Yua hnun, hrơi plĕ hră jing hrơi mơak prong yom pơphăn. Mơnuih nao plĕ hră khŏm pơtrut tui tơlơi gơgrong mơ̆ng pô či ruah mă ƀing khua laih anun thâo pơmin anai lĕ tơlơi gêh găl kơ ta samơ̆ ăt jing tơlơi ƀing ta gơgrong hăng tơlơi đĭ kyar mơ̆ng lŏn ia mơn”.

Bruă ruah khua pơ ala mơnuih ƀôn sang dêh čar tal 16 hăng khua mua pơ ala mơnuih ƀôn sang djŏp gưl rơwang thun 2026-2031 jai yom dlăm hloh lơ̆m pơphun amăng hrơi mông Jơnum ruah khua ping gah dêh čar tal 14 tŭ yua truh kih, pơsit rơđah tơlơi lăng nao pơ anăp, tơlơi gơñăm či đĭ kyar lŏn ia amăng rơnuk phrâo hăng ruah mă ƀing khua rơgơi, kjăp bruă kơđi čar, thâo pơmin, hơdip klă, thâo pơčeh phrâo hăng pran jua tuh rơyuh kơ lŏn ia. Ơi Nguyễn Văn Phúc, Kơ-iăng khua hơđăp Jơnum min bơwih ƀong mơ̆ng Ƀirô khua pơ ala mơnuih ƀôn sang dêh čar lăi: truh kih mơ̆ng jơnum ruah khua ƀu kơnong ngă atur kjăp phik đôč ôh ăt ngă kjăp tui tơlơi đăo kơnang mơ̆ng Mơnuih ƀôn sang hăng tơlơi git gai mơ̆ng Ping gah - anŏ pơsit brơi djŏp tơlơi dưi ngă hơkrŭ Việt Nam: “Jơnum ruah khua ping gah dêh čar tal 14 phrâo pơđut klă, tŭ yua laih, pok rai sa rơnuk đĭ kyar phrâo, rơnuk hrưn đĭ mơ̆ng djuai ania Việt Nam. Mơnuih ƀôn sang, mơnuih ruah khua đăo kơnang biă kơ tơlơi git gai mơ̆ng Ping gah hăng Khua mua pơ ala mơnuih ƀôn sang dêh čar, jing anom bruă prong hloh pơ ala brơi mơnuih ƀôn sang, anom bruă wai lăng Kơnuk kơna prong hloh. Mơnuih plĕ hră amra ruah mă djơ̆ pô dưi ngă bruă amăng Ƀirô khua pơ ala mơnuih ƀôn sang dêh čar či ngă klă, tŭ yua 3 anom bruă prong hloh mơ̆ng Ƀirô pơ ala mơnuih ƀôn sang, mơ̆ng anun djru ngă djŏp bruă yua Jơnum ping gah dêh čar tal 14 ba tơbiă”.

Lơ̆m mơnuih ƀôn sang nao plĕ hră djă ba pran jua đăo kơnang kơ jơlan ngă bruă hơmâo Jơnum ping gah pơčrâo brơi, lơ̆m gong gai kơnuk kơna hơmâo akŏ pơdong kiăo tui phun atur anun, sit anun jing pran kơtang, pơtrut prong biă kiăng lŏn ia ta kjăp tơkai mut amăng rơnuk đĭ kyar phrâo./.