Tui hăng Phun akha Sang bruă apui lơtrik kual Tŏng krah dêh čar (EVNCPC), thun 2024 pơkă hlâo rơnoh pơkĕ lu apui amra hmâo 4.194 MW, đĭ rơbêh kơ 10% bơhmu hăng thun hlâo. Amăng hơdôm hrơi pơ-iă hang ră anai, mrô apui yua 87,6 klăk KWh/sa hrơi. Ƀơi anăp tơlơi anun, EVNCPC hmâo črăo ba laih hơdôm anom bruă đing nao abih bang mơnuih mă bruă, pok pơhai khut khăt hơdôm bruă kơtưm pơkĕ apui yua hơđong kơ mơnuih mă yua.

Kiăo tui anun, iâo pơhrui đut hlah rơnoh jua 1.095 MW mơ̆ng hơdôm bôh sang măi pơkĕ apui hăng jua ia, iâo pơhrui mơ̆ng apui pơkĕ hăng pơ-iă yang hrơi năng ai ñu 1.970 MW, hăng apui pơkĕ mơ̆ng hơdôm glông hrĕ apui lŏn ia. Gơnong bruă apui lơtrik hơdôm bôh tơring čar, ƀôn prong kual Tŏng Krah dêh čar hăng kual Dap Kơdư pơtrut tañ rơnoh hơdôm rơwang bruă yua prăk pơdŏng tui kơčăo bruă, hrŏ trun rơnoh pơđoh apui kơ hơdôm glông hrĕ apui, măi tơtăng tơglưh apuih glăk mă yua. Amăng hơdôm hrơi pơ-iă hang ră anai, hơdôm bôh anom ƀu ngă tui bruă pok pơhai pơdơi, hrŏ trun pơkĕ apui; tơdah hmâo tơlơi truh pioh pơsir đôč pơdơi. Hrŏm hăng anun kơtưn mơnuih dô̆ gak wai pioh pơhlôm pơsir lơm hmâo tơlơi truh amăng rơwang 2 mông, tañ pơkĕ apui mă yua kơ mơnuih ƀôn sang./.