Thun 2025 laih rơgao, bruă tuai čuă ngui ƀơi Gia Lai ăt đĭ lu, hiam klă hơmâo rơbêh 12 klăk wơ̆t tuai nao ngui, lu hloh 17% pơkă hăng rơnoh jao thun hlâo; prăk pơhrui glăi hơmâo 29.000 klai.

Thun 2026, Gia Lai gir run kiăng čơkă truh 15 klăk wơ̆t tuai nao ngui, đĭ tui 21% pơkă hăng thun 2025; rơnoh prăk pơhrui glăi mơ̆ng bruă čơkă tui lĕ 35.000 klai. Kiăng dưi ngă djơ̆ tơhnal pơkă anai, hrŏm hăng bruă kơtưn pơđĭ tui boh tŭ yua mă bruă, mơnuih čơkă tuai kiăng hơmâo anih dŏ glăi, hyu ngui ngor hiam mơak, jơlan glông nao rai djop, bơwih bơwăng, mơnong ƀong huă jơman, hơdjă rơgoh. Yă Nguyễn Thị Kim Chung, Kơ-iăng Khua Gơnong bruă Gru grua Pơrơguăt drơi jăn hăng Tuai čuă ngui Gia Lai brơi thâo, thun Tuai čua ngui 2026 ƀơi Gia Lai dưi pơphun amăng 155 bit anih, pơphun jơnum gru grua mơak, amăng anun 21 mơta bruă jơnum ngui ngor yua kơ Ding jum Gru grua Pơrơguăt drơi jăn hăng Tuai čuă ngui dêh čar pơphun, 34 mơta tơlơi jơnum lĕ ngă hrŏm djop tơring čar, ƀôn prong hăng 100 mơta tơlơi ngui ngor yua tơring čar pơphun.