Tui gơnong bruă gru grua, bơrơguăt drơi jăn hăng tuai čuă ngui tơring čar Lâm Đồng, mrô tuai hyu ngui, dŏ glăi bơyan anai him lăng giăm 650.000 wŏt, amăng anun tuai mơng tač rơngiao giăm 30.000 wŏt, pơhrui mơng tuai čuă ngui him lăng giăm 1.200 klai prăk. Sang jưh tuai hơmâo yua mơng 70-80%, kơnong hơdôm sang jưh tuai mơng 3-5 asar pơtŭ mơng 85-90%.

Bơyan anai, lu bruă tui gru grua-ngui ngor hơmâo pơphun anun lĕ Countdown-čơkă thun phrâo 2026 ƀơi Đà Lạt, Mũi Né hăng kual Yŭ Lâm Đồng, hrŏm hăng hơdôm jơlan hơdră adôh suang, ngui ngor ƀơi hơdôm kual, anih čuă ngui. Sit biă ñu, Lâm Đồng hơmâo čơkă hơmâo boh rơdêh por pơgiăng tuai blung a thun 2026, čơkă giăm 200 čô tuai, pơgôp pơƀuh brơi rup rap anih tui nao rơnuk rơnua, mơ-ak klă.

Pơphun brơi lu črăn jơnum Thun čuă ngui Dêh čar - Gia Lai 2026, Gơnong bruă Gru grua, Bơrơguăt drơi jăn hăng Tuai čuă ngui tơring čar Gia Lai ngă hrŏm hăng Anom bruă tơdron rơdêh por Phú Cát, Anom bruă rơdêh por VietnamAirlines hăng Khul Tuai čuă ngui pơphun čơkă ƀing tuai blung a nao pơ Gia Lai amăng thun phrâo. Rơdêh por mrô VN1392 mơ̆ng Anom bruă rơdêh por VietnamAirlines pơgiăng 185 čô tuai nao pơ Gia Lai amăng hrơi blung a akŏ thun phrâo 2026.

Ƀơi tơdron rơdêh por, ƀing tuai hơmâo čơkă hăng tơlơi ayun suang kơdăt ania čơgrai mơak biă, hăng tơlơi pơpŭ, bơni hơơč kơ thun phrâo, gơnam pơpŭ hmư̆ hing mơ̆ng plơi pla brơi kơ ƀing tuai. Thun 2026, Gia Lai pơ-ư ang hơmâo Ding jum Gru grua, Bơrơguăt drơi jăn hăng Tuai čuă ngui ruah ngă anih pơphun Thun čuă ngui Dêh čar, kiăng pơƀuh hyu kơtang tơlơi găl, gru grua ia iŏm hiam hăng bruă bơwih brơi tuai čuă ngui, gir čơkă năng ai 15 klăk wơ̆t tuai, pơhrui hơmâo 35.000 klai prăk.