Lơm anun, Jơnum ngui gru grua kơphê rŏng lŏn tơnah pơphun dong mơng lơ 18/12 truh lơ 2/1/2026, hăng tơlơi kơđŏm glăi lĕ anih ĕp lăng gru grua kơphê rŏng lŏn tơnah, anih pơdă prưng-nao kơphê kơphê, ƀong huă hăng hơdôm jơlan hơdră ngui adôh suang anun lĕ ngui adôh kơphê-phố núi, Gru hiam kual Nam Mỹ, Noel hăng čơkă thun phrâo 2026. Ơi Nguyễn Văn Lộc- Khua gơnong bruă gru grua, bơrơguăt drơi jăn hăng tuai čuă ngui tơring čar Lâm Đồng pơsit tong, kơphê ƀu djơ̆ kơnong lĕ gơnam bơwih ƀong huă phun đôč ôh mơ̆ ăt lĕ pơ ala brơi gru grua, gru hơdip pơlir hăng tơlơi hing ang, tơlơi hơdip hăng anŏ yôm phara mơng djop dêh čar. Hăng rơbêh ha rơtuh thun pơjing hăng pơđĭ kyar, Lâm Đồng hơmâo pơsit tong tơlơi gơgrong phun amăng glông pơlir rơnoh kơphê Việt Nam, pơlir hăng bruă pla pơjing hiam hơdjă, pơkra klă, pơčeh phrâo hăng tuai čuă ngui kơphê.

“Hluai tui hơdôm anih ĕp lăng, pơdă prưng, pơƀuh nao rai gru grua hăng jơnum jar kmar, jơnum ngui amra pok rai anih pơbưp pok phư, anih kơphê Việt Nam hơmâo dưm amăng glông rô hrŏm mơng gru grua kơphê rŏng lŏn tơnah. Pơ anăp anai, tơring čar Lâm Đồng čang rơmang jơnum ngui amra jing bruă pơphun tui tơđar đăo gơnang, kơđŏm glăi anŏ phara mơng tơring čar Lâm Đồng, anai lĕ anih pơbưp nao rai mơng ƀing mơnuih hor mơñum kơphê amăng tar ƀar rŏng lŏn tơnah”.

Amăng hơdôm hrơi jơnum ngui pơphun Jơnum kơphê jar kmar, hơdôm tơlơi ngui pơphun rôk tui jơlan glông hăng lăi pơthâo Khul pơlir kơphê Việt Nam-Rŏng lŏn tơnah, pơhưč lu mơnuih ƀôn sang hăng tuai čuă ngui, pok rai tơlơi dưi ngă hrŏm jar kmar, pơtrut pơđĭ hơđong kjăp gơnong bruă kơphê hăng tuai čuă ngui gru grua mơng Đà Lạt-Lâm Đồng.

Amăng ayuh hyiăng rơ-ơ̆ rơ-ŏt ƀơi Đà Lạt, kual jum dar dơnao Hồ Xuân Hương lăng hyu ƀlĭp hăng dik dak hăng jơnum ngui rôk jơlan, sa tơlơi ngui yôm amăng hơdôm hrơi Jơnum ngui atông čing hơgor kual Ngŏ dơnung Asia thun 2025. Ƀơi anih hơđong mơ-ak jum dar dơnao ia, glai kyâo hngo hăng bơnga bluh lăng hiam, jua čing hơgor atông hmư̆ tơ-ua ban, mut hrŏm hăng tơlơi ayun suang mơng hơdôm rơtuh čô mơnuih kơhnâo kơhnăk mơng hơdôm boh tơring čar: Dak Lak, Gia Lai, Quảng Ngãi, Phú Thọ hăng tơring čar Lâm Đồng. Rĭm grup, rĭm djuai ania ba nao jơnum ngui rôk jơlan djop mơta anŏ yôm phara, pơgôp ba glăi rup rap hiam hloh, pơƀuh anŏ phara mơng gru grua čing hơgor Việt Nam hăng kual Ngŏ dơnung Asia. Mut hrŏm hrơi jơnum ngui, mơnuih kơhnâo kơhnăk Trần Ngọc Dũng, djuai ania Thái, rai mơng tơring čar Phú Thọ brơi thâo:

“Rai pơ kual lu djuai bơnga Đà Lạt amăng pran jua ăt mưn phara mơn. Lăng hyu mơ-ak biă mă, ayuh hyiăng rơ-ơ̆ rơ-ŏt, ană mơnuih jê̆ giăm. Pơ anai bưp lu djuai ania phara hơmâo wŏt djuai ania mơng tač rơngiao truh pơ hơdôm gru grua phara dong. Amăng pran jua mơnuih kar hăng ƀu gưt tơbiă đuăi mơng anai ôh”.

Ƀu djơ̆ kơnong lĕ hrơi ngui ngor djop djuai ania Việt Nam, jơnum ngui rôk jơlan glông ăt lĕ anih pơbưp nao rai gru grua jar kmar. Mơnuih kơhnâo Thong Souphoni, rai mơng plơi prong jưh jom Viêng Chăn, dêh čar Lao brơi thâo, mut hrŏm jơnum ngui atông čing hơgor kual Ngŏ dơnung Asia thun 2025 yua tơring čar Lâm Đồng pơphun, grup mơnuih kơhnâo kơhnăk mơng dêh čar Lao ba rai hơdôm jua čing hơgor, buh eng ao gru grua hăng hơdôm anŏ yôm phar hăng Đà Lạt-Lâm Đồng ăt kơđŏm glăi lu tơlơi mơ-ak klă hăng ƀing kơhnâo kơhnăk:

“Ƀing kơhnâo kơhnăk mơng Lao hrơi anai buh eng ao Lao, akhăn tuang Lao hiam biă mă. Ƀơi Lâm Đồng hơmâo lu anih čuă ngui hiam, ayuh hyiăng rơ-ơ̆ dong. Lu djuai ania hiam. Mơnuih ƀôn sang hơdip rơhmač mơ-ak hăng lu gơnam ƀong jơman”.

Amăng hơdôm hrơi Jơnum ngui atông čing hơgor kual Ngŏ dơnung Asia thun 2025, Jơnum ngui rôk jơlan pơphun jum dar dơnao Hồ Xuân Hương-Đà Lạt ƀu djơ̆ kơnong kiăng ngui pơƀuh đôč ôh mơ̆ ăt lĕ kiăng tơkuh nao rai djop djuai ania, djop dêh čar amăng kual hluai tui anih ngui gru grua čing hơgor-gru grua yôm mơng ană mơnuih. Hơdôm jua čing hơgor hmư̆ tơ-ua bang tong krah Đà Lạt lăk bang hyu tơlơi pơsit kơ pran gum pơgôp, pơpŭ tơdruă hăng djă pioh rơnoh yôm gru grua hơđăp amăng tơlơi hơdip phrâo./.