Ƀơi phường Buôn Ma Thuột, tơring čar Dak Lăk, Khul tơlơi pơtô djơ̆ Kơnuk kơna ngă hrŏm hăng Khul boh pia hiam gru grua đưm tơring čar pơphun jơnum ră ruai “Boh pia mơak, gru hiam amăng tơlơi hơdip djŏp djuai ania ƀiă kual Dap Kơdư - Tơlơi glăk hơmâo hăng jơlan đĭ kyar pơ anăp”.

Ƀing khua pơsit, kual Dap Kơdư ƀu kơnong jing anih dŏ hơdip mơ̆ng lu phung djuai ania, hăng gru đưm lu, phara biă mă; lu phung djuai ăt dŏ djă pioh tơlơi pơhiăp, boh hră; eng ao hăng tơlơi ngă yang. Samơ̆, amăng hrơi blan hơdip hrŏm hăng lu djuai ania pơkŏn, gru grua tơlơi phiăn pơplih tui tañ biă, lu anŏ yom amuñ rơngiă hĭ, anun bruă djă pioh kiăng nao hrŏm hăng bruă čơkă tuai hyu ngui, djru bruă bơwih ƀong hơđong kơ mơnuih ƀôn sang. Lu tơlơi pơgôp hiăp lăi, mơnuih apăn bruă gah boh pia gru grua đưm djuai ania ƀiă dŏ kơƀah, tơlơi djru aka ƀu lăp djơ̆, bruă pôr pơhing ƀơi anŏ ñu aka ƀu tơpă sit. Mông jơnum ră ruai anai brơi ĕp ƀuh rơđah tơlơi hơget glăk hơmâo, djru pok pơhai tơlơi pơtrun mơ̆ng Ping gah kơ akŏ pơjing gru grua boh thâo đưm, anăp nao anŏ yom hơdong, gru grua hiam prong tui./.