Mơ̆ng mơguah sing bring, ƀơi lan sang jơnum plơi ƀuôn Đôn, să Krông Na, tơring glông Buôn Đôn, tơring čar Dak Lăk mơak dik dak. Rim čô mơnuih ngă sa mơta bruă, mơ̆ng prăp rơmet tơpai čeh, mơnŏng un, tơnă asơi, dăp asơi ia či ngă yang...hlơi hlơi lêng kơ hơmâo bruă soh. Ơi Y Lươm Knul, Kơ-iăng khua Jơnum min mơnuih ƀôn sang să Krông Na brơi thâo, neh met wa ngă yang ƀơi pin ia Bay Rong, ƀuôn Đôn. Mah jing tơlơi ngă yang mơ̆ng sa boh plơi đôč samơ̆ neh met wa ƀơi hơdôm boh plơi iao gah ăt nao ngui hrŏm, ngă brơi hrơi ngă yang mơak kar hăng hrơi ngui ngor.“Ƀơi să Krông Na, tơring glông Buôn Đôn, tơlơi ngă yang pin ia yôm biă mă hăng djuai ania M’nông. Anai jing sa tơlơi phiăn hiam sui hloh mơ̆ng ơi yă ta pioh glăi truh kơ ră anai, pơlir hăng tơlơi hơdip mơda mơ̆ng ană plơi. Hlâo či pơphun ngă yang pin ia anai lĕ gong gai ăt prăp rơmet, iâu ƀing tha plơi, khua plơi, pô phai yang, ƀing kơhnâo kơhnăk jơnum, jao bruă brơi kơ rim čô mơnuih, pô anai ngă hơget, pô adih ngă hơget”.

Tui hăng tơlơi phiăn djuai ania M’nông, ngă yang pin ia kiăng pơpŭ kơ yang rơbang, yang ia brơi kơ ană plơi hơmâo angin klă hơjan hiam, bơyan pơdai mơboh jor kơtor mơboh lu; ană plơi pla hiam drơi jăn či ngă hmua pla pơjing, akŏ pơdong plơi pla trơi pơđao yâo mơ-ak. Tơlơi ngă yang juăt hơmâo ngă lơ̆m plơi pla hơpuă yuă giong, abih bang gum nao kih rơmet pơ pin ia, drun ia agaih hiam, laih anun prăp rơmet kơ sa bơyan phrâo. Tha plơi Y Thơng Kđoh dŏ ƀơi ƀuôn Trí, să Krông Na brơi thâo, yua hơmâo lu anŏ yôm anun jing ngă yang pin ia ăt jing hrơi ană plơi tum jơngum bơbưp nao rai. Hơdôm gơnam ngă yang yua ană plơi gum pơgôp pơdah pran jua thâo pơpŭ hăng tơlơi gum pơgôp ană mơnuih ta: “Mơnuih ƀôn sang nao lu biă, đưm adih arăng pơčruh braih či tơkŏng tơpai čeh, truh hrơi ngă yang arăng pơčruh ha drơi un, rim čô pơčruh đơset či blơi un ngă yang. Ngă yang pin ia đưm adih juăt pơphun blan 3 truh kơ blan 6 rim thun, kiăng adai lăp, hơjan hlim rơnang. Dua dong lĕ kiăng ană mơnuih lơ̆m mut amăng bơyan phrâo, plơi pla hiam drơi jăn pran jua, kiăng ngă bruă hơmâo lu, pơdai kơtor hơmâo lu”.

Amăng tơlơi ngă yang pin ia mơ̆ng djuai ania M’nông, hơdôm tơlơi ngă yang yua sa čô mơnuih phai hăng 2 čô drju. Pô phai juăt ñu tha plơi ƀudah mơnuih ană plơi kơnang, hơmâo yang pơdô̆ lui kơ ñu tơlơi rơgơi, thâo hơdor lu tơlơi phai, thâo lu yang rơbang. Pô phai yơh pô pơ ala brơi ană plơi pơhiăp tom yang rơbang.

Amăng hrơi mông kơdrưh yôm, abih bang mơnuih dŏ kret ƀơi ia krông Sêrêpôk, pô phai buh ao đưm ngă yang. Jua čing mơñi mơ-ak biă, mut hrŏm hăng tơlơi phai, mơ-it nao tơlơi rơkâo mơ̆ng mơnuih ƀôn sang kơ sa bơyan phrâo angin klă hơjan hiam, hơmâo pơdai kơtor.

Ngă yang pin ia hơmâo 3 wơ̆t phai, hơmâo phai kơ ơi yă, phai ƀơi pin ia, hăng phai pơpŭ kơ tha plơi hăng ƀing tui djru. Pô phai Y Nga Glan, dŏ ƀơi ƀuôn Đôn brơi thâo, amăng rim tơlơi ngă yang, hơdôm gơnam ngă yang amra pơyơr kơ yang ƀơ̆i hlâo, ană plơi ƀong tơdơi. Hrŏm hăng gơnam yua ană plơi prăp rơmet, hơdôm mơta gơnam juăt yua kah hăng tơbak, dao, hơmlơi, hơdăng apui, hlin khŏm hơmâo amăng hrơi ngă yang. Pô phai brơi thâo: “Hơmâo asơi, braih, tơpai, mơnŏng un hăng gơnam pơkŏn...Tơlơi ngă yang anai hơmâo mơ̆ng đưm laih, sui ƀlem yơh, mông hơane ƀing ta ngă tui tơlơi phiăn mơ̆ng djuai ania ta”.

Amăng hrơi ngă yang, jua čing mơñi tơ-ua ƀơi ia krông Sêrêpôk, tơlơi ayun suang hiam jing ngă kơ hrơi ngă yang mơak dik dak ƀơi ia krông Sêrêpôk. Amai H’Nụ Bu Dăm, dŏ ƀơi ƀuôn Ea Mar, să Krông Na brơi thâo: hơdôm boh plơi pla mơ̆ng djuai ania M’nông lêng dŏ giăm pơ ia krông anai, neh met wa ruah hơdôm čroh ia, anih hơmâo ia čă či ngă pin ia, drun ia:“Ia krông Sêrêpôk pơ anai ăt jing ia krông hơmâo sui laih, dŏ hrŏm hăng aneh met wa pơ anai. Ngă yang pin ia hơmâo anŏ yôm dong lĕ bơni kơ ia rô găn nao, hăng hơmâo ia či mơñum, či yua amăng sang anŏ, plơi pla hơdip mơ̆ng ia anai mơn”.

Jing tơlơi phiăn yôm biă hăng djuai ania M’nông pơ guai dêh čar, tơlơi ngă yang pin ia ƀu kơnong pơƀuh tơlơi lăp đing nao, pơgang ba ia yua mơ̆ng ană plơi đôč ôh mơ̆ ăt jing hrơi kiăng pơlir hơbit ană plơi pla, jing hrơi abih bang pơbưp, ngui ngor, gum djă pioh gru ama grua amĭ mơ̆ng đưm hlâo./.