Črâo nao eng ao glăk buh, amai K’Hều, dŏ amăng ƀut plơi 1, să Đưng Knớ, tơring glông Lạc Dương, tơring čar Lâm Đồng hok mơ-ak brơi thâo, anai lĕ eng ao yua ñu pô mơñam amăng 2 wŏt hrơi tơjuh. Amai K’Hều bơră ruai glăi, lu adơi amai amăng plơi pla pơanur tơdruă mơñam mrai, lơm pơƀuh hơdôm eng ao amăng plang mơnuih mơnam ăt hơmâo lu mơnuih hor hăng rơkâo blơi yua.

“Lơm kâo pơƀuh amăng  facebook, đa hơmâo mơn lu mơnuih rơkâo lui hlâo kiăng mơñam brơi sa, dua blah eng ao. Yua thâo ăt dưi sĭ mơdrô brơi lu mơnuih yua anun kâo mơñam mă kiăng hơmâo eng ao sĭ hơmâo dong prăk pơhrui. Anai lĕ tơlơi ngă kơ kâo hok mơ-ak biă mă, khŏm mơñam na nao mơn. Pơ anăp anai kâo amra kiăo tui hrăm dong”.

Bơ amai Bon Niêng K’Huyên, dŏ hrŏm amăng plơi brơi thâo, yua thâo mơñam mơ̆ ñu hơmâo dong prăk pơhrui amăng hơdôm hrơi rơhông bruă.

“Kâo kiăo tui hrăm hăng thâo mơñam mrai 1 thun anai laih. Lơm hơmâo wăn amra mơñam laih anun ba sĭ pơ Lạc Dương adih, nua mơng 550-600 rơbâo sa blah, ha blan dưi mơñam 4 blah. Ră anai glăk hor kiăo tui hrăm mơñam mrai, čang rơmang pok anih pơtô mơñam mrai kiăng huăi rơngiă hĭ gru grua djuai ania”.

Lơm arăng rơkâo blơi rĭm hrơi jai lu tui, ƀing adơi amai tum pơƀut jing sa grup mơñam kiăng kơ abăn ao mơng gơñu hơmâo lu anih blơi mut ƀiă dong. Amai Boh Niêng K’Gut, dŏ amăng ƀut plơi 1, să Đưng Knớ brơi thâo, yua pơlir hơbit hăng Caritas Đà Lạt, grup mơñam mrai mơng ñu hơmâo dong anih rơkâo blơi bơnal kiăng čoh eng ao pơdô̆ rơkơi bơnah, lang amăng sang, čoh eng ao tui rơnuk phrâo…ñu ăt pok anih pơtô hrăm pơ sang kiăng hơmâo dong lu mơnuih mut hrŏm mơñam mrai.

“Kâo čang rơmang tŏ tui, ngă lar hyu tơl ƀing hlăk ai pơkŏn dong, pơgôp amăng bruă pơjing gru grua djuai ania. Hơmâo pok anih pơtô mơng thun hlâo laih, pơtô hrăm brơi 15 čô mơnuih, ră anai 5 čô mơñam hơjăn hăng sĭ mă pô. Gah Caritas gum hrŏm amăng bruă pơjing sa grup ngă hrŏm. Hơmâo mơnuih trăm ia mriah, jŭ, mơnuih hơngah mrai, đa ngă bruă anai đa ngă bruă adih kiăng hơmâo lu bơnal, lăp djơ̆ hăng anŏ kiăng samơ̆ huăi rơngiă gru grua mơng djuai ania pô”.

Ƀơi kual ataih tơring glông Lạc Dương hăng rơbêh 90% mrô mơnuih lĕ djuai ania ƀiă, amăng hrơi blan rơgao, să Đưng Knớ hơmâo lu tơlơi đing nao tuh pơ alin mơng Ping gah hăng Kơnuk kơna, man pơdong anih anom, jơlan glông, apui lơtrik, sang ia jrao. Să Hơmâo tŭ yap să plơi pla phrâo thun 2021. Mơng blan 7 thun anai, tơring glông Lạc Dương lăi pơthâo akŏ bruă man pơdong plơi pla bơwih brơi tuai čuă ngui ƀơi să Đưng Knớ, tơlơi anai pok rai bruă djă pioh gru grua pơlir hăng pơđĭ kyar bơwih brơi tuai čuă ngui amăng plơi pla.

Yă Phi Srônh K’Ham, Khua khul đah kơmơi să Đưng Knớ brơi thâo, tui jơlan gah mơng tơring glông, khul đah kơmơi ăt pơtrut pơsur, tum pơƀut adơi amai tŏ tui pơđĭ kyar bruă mơñam mrai, ƀơƀrư̆ pơjing bruă bơwih brơi tuai čuă ngui amăng plơi pla.

“Tŏ tui gru grua djuai ania kiăng kơ djă pioh brơi rơnuk tơdơi dong yua anun ƀing adơi amai ƀơi anai ăt hơmâo pơtô brơi bruă mơñam hơngah mrai, bơnal mơñam rai dưi pơđĭ kyar klă, đĭ tui prăk pơhrui brơi adơi amai. Ră anai hơmâo hơdră djru, Khul đah kơmơi glăk đing nao tum pơƀut glăi 20 čô adơi amai kiăng čan prăk pioh tuh pơ mơñam mrai, rĭm boh sang anŏ dưi čan lu hloh lĕ 50 klăk prăk”.

Hăng hơdôm tơlơi črâo ba tong ten mơng gong gai ƀon lan kơ bruă djă pioh hăng lăi pơthâo gru grua mơñam mrai, ƀing đah kơmơi djuai ania K’ho ƀơi să kual ataih Đưng Knớ glăk ƀơƀrư̆ pot glăi bruă mơñam hơngah mrai yua anun hơdôm bơnal mơñam ăt hiam tui mơn, dưi čoh jing eng ao hăng bơnal mrai tui rơnuk phrâo anai. Bruă mơñam mrai ƀu djơ̆ kơnong djru brơi mơnuih ƀôn sang hơmâo dong prăk pơhrui đôč ôh ăt pok rai bruă pơjing plơi pla bơwih brơi tuai čuă ngui amăng kual plơi pla phrâo dong. /.