Mut tơma amăng pran hăng jua đing ƀuôt mơ-ak rơnguă, Y Puen Niê sit nik jing sa čô kơhnăk rơgơi mơbruă tơdơi kơ bruă ngă pô gơgrong bruă Gong phun pơtui jua pơhiăp să Čư̆ Pui, tơring glông Kông Bông, tơring čar Dak Lăk. Gah rơngiao lăng ñu ƀu hơmâo hơget phara đơi ôh, samơ̆ pran jua ñu hur har hăng jua čing, jua goong brô̆ mơ̆ng djuai ania Êđê.

Hrăm giong sang hră Trung cấp Đam San, ayong Y Puen Niê thâo lu mơta tơlơi đah mơ̆ng thâo hluh hăng pơpŭ gru grua hiam mơ̆ng ơi yă pioh glăi. Ayong Y Puen Niê brơi thâo, hor kơ gru grua djuai ania, lơ̆m ñu 15 thun, ñu thâo pơkra laih đing buôt:“Lăi nao gru grua djuai ania Êđê, kah hăng atông čing, ayup đing năm, ƀing buôt, adoh Eirei mut tơma amăng pran jua ñu mơ̆ng anet laih. Kâo hơmâo hrăm mơ̆ng ơi yă, ƀing wa, ƀing neh...Truh kơ prong kâo tơlơi hor hrăm ayup, pĕ djŏp djuai goong brô jai hrơi prong tui. Kâo gir biă mă kiăng thâo pơkra hăng mă yua. djuai goong brô blung a kâo pơkra lĕ đing buôt, tơdơi kơ anun lĕ goong, brô̆, đing tut...Tơlơi yôm hloh lĕ tơlơi hor mơ̆ng sit pô ta”.

Ayong Y Puen Niê pioh mông hơduah ĕp anih phun ñu pơkra rai djuai goong brô̆, anŏ yôm mơ̆ng rim djuai goong brô̆, mơ̆ng jua čing mơñi truh kơ jua đing t’rưng, jua đing ayup mơ̆ng ÊĐê hăng tơlơi adoh kưt rơnguă ƀudah jua đing năm hăng tơlơi adoh eirei đik đak mơ-ak mơ-ai. Laih anun ñu pơtrut pran jua anun hăng ƀing hlăk ai:“Lơ̆m kâo dưi ngă, kâo pơtô glăi kơ ană bă, ană amon amăng plơi, amăng să, amăng tơring glông. Kâo hơmâo iâu nao pơtâo ƀing čơđai pơ lu anih phara. Amăng blan 4 phrâo rơgao, kâo hơmâo nao pơtô atông čing, čing kram, đing ayup, đing tơki kơbao, đing brô̆ goong hăng djŏp djuai goong brô̆ pơkŏn ƀơi Hà Nội adih. Ƀing čơđai hrăm tui tañ biă, samơ̆ rơnuk anai ƀing čơđai ñu hla tui lu gru grua amăng plang facebook, tiktok jing bơbeč ƀu ƀiă ôh hăng tơlơi hor hrăm tui”.

Hơdôm anih hrăm atông čing, atông đing t’rưng...yua ayong Y Puen Niê pơtô brơi jing anih ngui ngor tŭ yua, mơak hăng ƀing čơđai ƀơi lu plơi pla. Mô̆ H’Tra Ƀuôn Yă (10 thun), phrâo mă pri 2 amăng tơlơi pơplông adoh tơlơi adoh đưm tơring glông Krông Bông lăi:“Ƀing gơmơi hor kơ tơlơi adoh, tơlơi suang tui gru đưm sui laih. Truh kơ hrơi bưp met Y Puen, ƀing gơmơi hơmâo hrăm atông čing kông, čing kram, adoh erei, ayup đing tut...Kâo hăng ƀing gơyut nao hrăm. Gơmơi hơmâo nao pơplông, gơmơi mơ-ak biă mă”.

Ayong Y Puen Niê jing sa čô mơnuih hur har ngă bruă amăng hơdôm grup atông čing, pĕ atông djuai goong brô̆ đưm mơ̆ng să Čư̆ Pui, djru ba pơƀuh gru grua djuai ania Êđê pơ lu tơring pơkŏn. Ayong Y Phinh Ƀuôn Yă,  nai pơtô Sang hră gưl sa Dang Kang 1, să Dang Kang, tơring glông Krông Bông lăi:“Hmư̆ mơ̆ng ataih kar hăng čim mơni čơkă pơ-iă pơčrang, hmư̆ jê̆ kar hăng jua čing bơyan yan. Kâo hor hmư̆ ayong Y Puen Niê pĕ atông biă mă. Hơdôm djuai goong brô̆ ñu pơkra mă hăng kram, pơ-ô, jê̆ giăm hăng glai klô, jê̆ giăm hăng ană plơi mơ̆ng anet truh kơ ƀing tha. Čang rơmang ayong Y Puen Niê hiam drơi jăn pran jua đah mơ̆ng dưi pơƀuh hyu gru grua hiam anai”.

Hăng tơlơi rơgơi hăng pran jua kiăng khăp, Y Puen Niê hơmâo ngă lu bruă truh kih, hmư̆ hing ƀơi hrơi pơplông pĕ goong atông brô̆ gưl tơring čar, tơring glông. Pơhmutu kar hăng Miđai Mah pơplông adoh suang gưl tơring čar hăg pri B adoh suang khul tơhan blah ngă tơring čar Dak Lăk. Hrơi jơnum ngui gru grua djŏp djuai ania tơring čar Dak Lăk thun 2023, grup atông čing kram yua ñu pơtô hơmâo mă pri B hăng tơlơi atông čing kram hăng suang iâu mơñum tơpai mơ-ak bơyan hơpuă yuă.

Tơlơi ră ruai kơ Y Puen Niê, sa čô mơnuih hor kơ gru grua djuai ania pơsit brơi tơlơi hơdip kjăp kơtang mơ̆ng Dap Kơdư. Amăng tơlơi hơdip tui rơnuk phrâo, ăt hơmâo mơn ƀing hlăk ai thâo pơmin, djru bruă djă pioh hăng bang hyu gru grua yôm anun. Mơnuih kơhnăl Y Phuen Niê sit jing gru kơnuih hiam, jing mơnuih pơ-ư pơ-ang mơ̆ng djuai ania Êđê ƀơi Dak Lăk./.