Tui tơlơi phiăn mơng mơnuih djuai ania Bahnar, bruă prap lui bông kơ mơnuih ruă kraih ƀu djơ̆ kơnong lĕ prap lui hrơi mông glăi pơ ơi yă đôč ôh mơ̆ ăt lĕ rơkâo “bưng hiam”- hăng tơlơi đăo gơnang lơm bông pơkra giong mơnuih ruă amra suaih mơtăm. Hăng djuai ania Bahnar juăt lăi tui anai: “Buk long bong, hrong bơngai”, pơblang lĕ “bông phŏ hĭ, tơlơi hơdip dŏ glăi”-pơdah tơlơi pơmĭn lăng bông kar hăng gơnam pơ ala brơi mơnuih ruă kă.

Ơi Klưnh, 45 thun, mơnuih dŏ amăng plơi Kde Kông, să H’Ra, tơring glông Mang Yang, tơring čar Gia Lai brơi thâo, tơlơi phiăn anai hơmâo djă pioh mơng đưm đă ră hlâo, lơm tơlơi hơdip dŏ lu tơnap tap. Rĭm wŏt hơmâo mơnuih ruă kraih, neh met wa amra nao pơ glai trơ̆i sang ƀĕ kyâo pơprong, arăng ƀoh ngă bông. Tơdah mơnuih ruă kraih ƀu suaih amra hơmâo bông prap lui hlâo yơh, ƀu kiăng hyu trơ̆i kyâo ča čot ƀudah hyu ĕp blơi glăi dong tah. Ơi Klưnh bơră ruai glăi:

“Đưm hlâo adih, rơnuk ơi yă amĭ ama ăt pioh lui bông pơgŭ krum, kiăng pioh yua brơi abih bang mơnuih amăng plơi pla. Hlơi djai brŭ amra nao mă bông ba glăi dưm mơnuih djai”.

Tơlơi yôm phăn lĕ ƀu djơ̆ hlơi hlơi lêng kơ dưi prap lui bông hlâo ôh. Mơnuih djuai ania Bahnar kŏm prap lui bông kơ mơnuih glăk suaih pral, yua kơ hŭi jing tơlơi pơmĭn sat kơ arăng. Tơdah kiăng prap lui hlâo, ƀing gơñu amra lăi “pơkra tong un” kiăng kơ arăng huăi pơmĭn sat kơ tơlơi anai.

Tơlơi phiăn prap lui hlâo bông ƀu djơ̆ kơnong tơlơi juăt ƀuh amăng rĭm boh sang anŏ đôč ôh mơ̆ ăt juăt ƀuh amăng plơi pla ala ƀon dong. Hlâo adih, lu plơi pla djuai ania Bahnar ăt djă pioh bông hrŏm pơgŭ krum-anai lĕ gru grua amăng plơi pla-kiăng mă yua tơdơi hơmâo mơnuih rơngiă amăng plơi pla. Rơngiao kơ bruă prap lui hlâo brơi mơnuih djai brŭ, tơlơi phiăn anai ăt pơlir hăng tơlơi ngă yang rơbang mơng đưm hlâo. Ơi Suk, dŏ amăng tơring kual Đăk Đoa, tơring čar Gia Lai brơi thâo:

“Bruă prap lui hlâo bông ăt lĕ kiăng jăm ƀuah yang rơbang ngă kơ mơnuih amăng sang anŏ dju djuam duam ruă na nao. Ngă tui anun kiăng pơdah pran jua ƀu hŭi tơlơi djai brŭ ôh, prap rơmet glăi pơ ơi yă laih. Hăng mơnuih djuai ania Bahnar juăt lăi tui anai “Buk long bong, hrong bơngai” pơblang lĕ “Bông phŏ hĭ, tơlơi hơdip dŏ glăi hăng mơnuih ruă kă” lăng bông lĕ gơnam tla hnưh brơi yang rơbang, jing gơnam pơ ala brơi mơnuih ruă kă. Lu wŏt lơm pơkra giong bông mơnuih ruă kă amra suaih. Tơdơi anun arăng dưm djă pioh bông pơgŭ krum”.

Hlâo kơ trơ̆i kyâo ngă bông, mơnuih djuai ania Bahnar juăt pơphun ngă yang hăng asơi hăng hơđuh boh mơnŭ, rơkâo yang glai, yang čư̆ pơpŭ brơi. Lơm thâo sang anŏ glăk pơkra bông, neh met wa amăng plơi pla juăt ba asơi huă añăm ƀong kiăng kơ djru brơi-pơdah pran gum pơgôp pơlir hơbit hăng thâo djru tơdruă.

Ră anai, tui tơlơi pơđĭ kyar amăng tơlơi hơdip mơnuih mơnam, bruă prap lui hlâo bông mơng djuai ania Bahnar ƀu dŏ dong tah. Hơdôm anih prap lui bông hơmâo laih, hrŏm hăng tơlơi pơkă wai pơgang glai kyâo, ngă kơ bruă hyu trơ̆i kyâo ngă bông ƀu ƀuh dong tah. Ơi Yung, kơ-iăng Khua Jơnum min mơnuih ƀôn sang să H’Ra, tơring glông Mang Yang, tơring čar Gia Lai pơsit tong.

“Ră anai tơlơi hơdip kơ mơnuih ƀôn sang hơmâo pơplih hiam klă ƀiă yơh, ƀu hơmâo sang anŏ hơpă prap lui bông dong tah. Tơdah hơmâo mơnuih rơngiă neh met wa nao blơi bông, ƀu hyu trơ̆i kyâo ƀoh ngă bông dong tah. Sa, dua boh sang anŏ hơmâo ƀia pơkra mă, tơdah ƀu hơmâo nao blơi, huăi ƀuh hyu trơ̆i kyâo amăng glai kar hăng đưm hlâo dong tah”.

Tơlơi phiăn prap lui bông pơgŭ krum lĕ tơlơi kơđŏm glăi gru grua yôm phara, pơdah tơlơi hơdip hiam klă, ba glai pran khăp hăng pran jua mơnuih mơnam mơng djuai ania Bahnar. Hơdôm boh ƀông dŏ glăi glăk phŏ tui ƀơƀrư̆ pơgŭ krum, kar hăng tơlơi pơƀuh gru grua mơng đưm hlâo, brơi tơlơi hơdip tŏ tui, pơgôp djă pioh gru grua yôm phara mơng mơnuih djuai ania ƀiă kual Dap kơdư./.