Tơdơi 11 thun mơ̆ng hrơi hmâo Khua git gai Ping gah dêh čar ƀơi anăp nao čuă, tơña bla, pơsur, ơi Thào Dìn, sa čô mơnuih ngă đang hmua djuai ania Mông pơ̆ plơi Cốc Phương, să Bản Lầu, tơring glông Mường Khương, tơring čar Lào Cai ră anai giăm či truh 60 thun laih ăt dô̆ hơdor hơnong mơn hơdôm tơlơi pơtă ƀu prong mơn samơ̆ mut dơlăm amăng lăm mơ̆ng pô git gai bruă dlông hloh mơ̆ng Ping gah.

 Thun anun, ñu lĕ pô pơ ala kơ mơnuih ngă đang hmua rơgơi mơ̆ng Mường Khương ăt kah hăng tơring čar Lào Cai dưi hmâo Khua git gai Ping gah Nguyễn Phú Trọng nao čuă sang. Hlâo kơ anun, lu mơnuih thâo kơ Thào Dìn hăng anăn pia lĕ “pơtao čik”, pơhrui rim thun mơ̆ng sĭ bôh čik truh kơ 700 klăk prăk. Samơ̆ lơm Khua git gai Ping gah dêh čar nao, ƀu kơnong kơ hơdôm tơlơi bơni ôh mơ̆, ñu dô̆ lăi hơdôm tơlơi kiăng abih bang djop mơnuih mơ̆ng mơnuih apăn bruă, khua git gai truh mơnuih ƀôn sang khom pơmin. Anun lĕ pơđĭ kyar bơwih ƀong khom đing nao djru nao rai tơdruă pơđĭ kyar hrŏm, ƀu pioh hmâo tơlơi hleh hloh pơdrŏng hăng ƀun rin; pô pơdrŏng khom djru mơnuih ƀun rin tơnap tap, ping gah pơdrŏng djru kơ ping gah dô̆ tơnap tap hloh pioh “abih bang hơdai bơ đĭ pơdrŏng, abih bang gum hrŏm tơtlaih mơ̆ng ƀun rin”.

 “Hmư̆ wa lăi tui anun kâo ăt khom hrăm mă drơi pô, pơmin hơdră ngă hiưm hơpă pioh sang anô̆ pơđĭ kyar, laih anun khom gum hơbit, hmâo bruă hơget tơnap abih bang plơi khom djru ba tơdruă anun kah mơ̆ng dưi pơplih phrâo”.

 Hăng Thào Dìn, hơdôm tơlơi pơtă pơtăn mơ̆ng Khua git gai Ping gah dêh čar ăt lĕ pran pơtrut pioh truh ră anai, khă ƀu kơƀah gơnam ƀong, gơnam pioh lui, ñu ăt ruah hơdip amăng sang dăp tal 4 mơn, rim hrơi kreh kruñ ƀơi đang hmua. Mơnuih ƀôn sang plơi Cốc Phường hur har bơkơtưn, ră anai ƀu dô̆ sang anô̆ ƀun rin dong tah, hmâo truh rơbêh kơ 70% lĕ mrô sang anô̆ đĭ gŏ amŏ, dưi tŭ yap lĕ plơi pla phrâo ngă gru hlâo.

Hrŏm hăng pô ƀơi anăp hmâo Khua git gai Ping gah dêh čar nao čuă, ră ruai, Trung tá Nguyễn Ngọc Hà, Khua Puih kơđông pơgang guai dêh čar Bản Lầu, tơring glông Mường Khương ăt hơdor pioh mơn hơdôm tơlơi pơsur, pơtrut mơ̆ng Khua git gai Ping gah dêh čar, hrŏm hăng tơlơi pơtă pơtăn mơnuih apăn bruă tơhan, ling tơhan khom ngă klă bruă wai lăng guai dêh čar, pơtom hiăp, biă ñu khom dưi pơdŏng pran gơgrong kơjăp amăng mơnuih ƀôn sang.

“Hăng pran jua Khua git gai Ping gah Nguyễn Phú Trọng pơtă pơtăn, ƀing gơmơi hmâo djru laih neh wa hăng hơdôm bruă mă sit nik kah hăng djru pơjeh pla, hlô rông, pơtô neh wa pơplih hơdră ngă pioh hơđong tơlơi hơdip mơda, pơdŏng hơdôm bôh sang hră, anih luai ia pơgang pơhlôm hlâo huĭ ia ƀlung kơ čơđai muai pioh hơdor glăi hơdôm pran jua mơ̆ng neh wa hmâo jum ba, lăng ba ƀing gơmơi”.

  Djă pioh tơlơi pơtă mơ̆ng Khua git gai Ping gah, gưl Ping gah, Gong gai, Khul ling tơhan hăng Mơnuih ƀôn sang 12 djuai ania adơi ayong ƀơi Bản Lầu hơdôm thun rơgao gum hrŏm hơbit, gir run djă kơjăp tơlơi dưi pô, hơđong ƀơi guai dêh čar. Bản Lầu ră anai ƀu kơnong kơ pơdơi glăi lĕ anih anom pla čik, pơtơi mơ̆ng Lào Cai đôč ôh mơ̆, dô̆ hmâo ha rơtuh ektar đang čè, quế, hmâo wot kual ngă hmua pơdai phara Séng Cù, hrưn đĭ tañ jing să plơi pla phrâo pơđĭ dlông pơgi kơdih anai ƀu sui dong tah./.