Amăng mông bưp, mơnuih ƀôn sang tơring čar Dak Lak brơi thâo, lu bruă bơdjơ̆ nao tơlơi hơdip mơda kơ mơnuih ƀôn sang anun lĕ: bruă pơhrui glăi lŏn mơnai aka ƀu lăi pơthâo tong ten, dŏ kaih amăng bruă duh glăi prăk lơm mă glăi lŏn, gun găn amăng bruă ngă hră pơ-ar pơplih yua lŏn mơnai amăng plơi pla Buôn Ma Thuột, mah rơkâo đĭ lu wŏt samơ̆ aka ƀu hơmâo tơlơi lăi glăi lăp djơ̆, kah hăng sa, dua anom bruă bơdjơ̆ nao aka ƀu lăi glăi.

Hrŏm hăng anun, mơnuih ƀôn sang tơring čar Dak Lak ăt rơkâo djop gưl, djop gơnong bruă kiăng tŏ tui đing nao tuh pơ alin, pơkra ming jơlan amăng plơi prong hăng sa, dua ară jơlan amăng să glăk răm rai kơtang; đing nao bruă man pơkra dơnao pơkŏng ia; laih dong sem lăng hơdră djru brơi mơnuih apăn bruă amăng plơi pla; hơmâo hơdră djru pơhlôm nua ia jrao brơi mơnuih djuai ania ƀiă.