Anun lĕ boh tơhnal hơmâo lăi nao amăng mông tơña hăng lăi glăi amăng jơnum lok 16 Khul pơ ala mơnuih ƀôn sang tơring čar Lâm Đồng tal X pơphun amăng lơ 12/7. Mơng akŏ thun truh ră anai, tơring čar Lâm Đồng hơmâo pơsir 15 wŏt, hăng 21 čô mơnuih bơdjơ̆ nao bruă čan prăk mă kmlai lu, đĭ 9 wŏt pơhmu tui tơđar thun hlâo. Yă Cill Bri, Khua pơ ala mơnuih ƀôn sang ƀơi tơring glông Di Linh (Lâm Đồng) brơi thâo, bruă čan prăk mă kmlai lu glăk ngă tơnap tap, ƀu djơ̆ kơnong ƀơi hơdôm plơi prong đôč ôh ăt ƀuh amăng hơdôm boh plơi pla kual ataih, asuek, kual mơnuih djuai ania ƀiă amăng tơring čar.

Ƀơi anăp kơ tơlơi anai, kiăng kông ang kơtưn amăng bruă pơgăn hăng pel ĕp, pơsir hĭ. Kiăng hrưn đĭ klă dong amăng bruă pơgăn ƀing brơi čan prăk mă kmlai lu ƀơi Lâm Đồng, Đại tá Trương Minh Đương brơi thâo, kiăng hơmâo tơlơi mut hrŏm mơng djop anih anom kơđi čar, tơlơi gum hrŏm ha amăng plĕ mơng hơdôm anom bruă bơdjơ̆ nao.