Ƀơi mông jơnum anai, hơmâo 94 čô mơnuih hur har hloh amăng bruă bơkơtưn khom dưi gah ling tơhan blah ngă tơring čar Kon Tum hăng ƀing pơ ala kơ lu anom bruă hơmâo lăng glăi, pơtong rơđah bruă mă pơplông hrŏm amăng 5 thun rơgao. Boh yôm phun jơnum bưp nao rai anai, hơmâo 10 grup anom bruă, mơnuih ba gru hlâo jing kah hăng asar pơjeh hiam pơƀuh brơi pran jua mă bruă thâo gum pơgôp, pơčeh phrâo, găn rơgao tơlơi tơnap tap, mơnuih mă bruă hur har ba glăi lu boh tŭ yua, găn rơgao hĭ tơlơi tơnap tap lông lăng mơ̆ng mơnuih apăn bruă, khua mua, ling tơhan blah ngă amăng tơring čar Kon Tum.

Hrŏm hăng anun lĕ, hơmâo lu tơlơi ră ruai dlưh pran jua biă mă, pơtrut tơlơi gum pơgôp tong ten plah wah ling tơhan hăng ană plơi, kah hăng Khua mua anom bruă tơhan tơring glông Kon Plong amăng bruă Hơdor tơngia tla pran, djru  tơlơi bơwih ƀong huă kơ mơnuih ƀun rin; khua mua anom bruă ling tơhan tơring glông Đak Glei hăng hơbô̆ bruă čơgăn pơdă gơnam brơi soh đôč 0 prăk, thiếu tá ling tơhan blah ngă Nguyễn Thị Trinh hăng bruă mă djru tơlơi khăp pap, gum ba mơnuih ƀôn sang tơnap tap.