Amăng 6 blan akŏ thun 2024, Jơnum min mơnuih ƀôn sang tơring čar Dak Lak hơmâo lăi pơthâo jơnum min pơ ala mơnuih ƀôn sang tơring čar kĭ 18 mơta hră pơtrun hăng 31 hră pơsit tui tơlơi phiăn kơnuk kơna. Ră abih bang 19 mơta bruă ngă hră pơar tui hăng tơlơi pơsir mơ̆ng 19 boh gơnong bruă, anom bruă hơmâo tŭ mă hră pơar hăng jao glăi boh tơhnal pơsir ƀơi anih anom phun bơwih brơi bruă ngă hră pơar mơnuih ƀôn sang sa anih tơring čar.

Hrŏm hăng boh tơhnal dưi ngă laih, bruă pơblih phrâo ngă hră pơar ƀơi Dak Lak ăt dŏ lu tơlơi kơƀah. Tui hăng ơi Nguyễn Tuấn Hà, Kơ-iăng Khua jơnum min mơnuih ƀôn sang tơring čar Dak Lak, kiăng pơđĭ tui bruă mă lăp pran jua ană plơi, anom bruă kơnuk kơna ngă hră pơar kơ mơnuih ƀôn sang ƀơi djop sang bruă amăng tơring čar, tơring glông, plơi pla khom thâo hluh tong ten, mă bruă tơpă, pran jua hiam bơwih brơi kơ mơnuih ƀôn sang tui tơlơi pơtrun mă bruă yua kơ mơnuih ƀôn sang, mơnuih apăn bruă lĕ khom pơsir bruă jao.