Mơ̆ng sa boh măi telephôn rơgơi ƀu kơnong pioh hmư̆ hăng pơhiăp nao rai đôč ôh, yă H’Ƀĕ Êban ƀơi Ƀuôn Tah B, să Čuôr Dăng, tơring čar Dak Lak, ră anai thâo sem lăng tơlơi pơhing pơkă lăng hăng pơjrao duăm ruă hơmâo hră pơhlom nua ia jrao, kiăng ngă hră pơar gư̆ amăng phôn juăt lăi ngă hră online. Anŏ pơblih phrâo mơ̆ng hơdôm wơ̆t ƀing khua mua apăn bruă kơnuk kơna nao tơl sa, pơtô brơi hơdră mă yua ia rơgơi mrô amăng telephôn.

Ƀuôn Tah B, să Čuôr Dăng, tơring čar Dak Lak hơmâo 340 boh sang anŏ, amăng anun lĕ 90% mrô sang anŏ mơnuih djuai ƀiă. Anŏ tơnap amăng tơlơi pơhiăp, boh hră ăt ngă kơ lu mơnuih sư̆ rơbư̆ sit mut ĕp lăng ia rơgơi mrô. Ding kơna amăng grup hyu pơtô ba mơnuih ƀôn sang, nao tơl rĭm sang anŏ, pơčrâo ba, pơhiăp hăng tơlơi Êđê laih anun ngă brơi hră online mơtam brơi ĕp lăng, mơnuih ƀôn sang pô măi telephôn amra thâo mut ĕp mă tơlơi pơhing kơ ñu amăng măi telephôn soh. Amai H’Gói Niê, Khua grup ba yau ia rơgơi mrô amăng Ƀuôn Tah B brơi thâo:

“Kâo khom nao tơl rĭm sang pơtô brơi kơ mơnuih ƀôn sang ba yua măi telephôn, pok bơnah ia rơgơi VNeID, pơmut mrô hơgŏm mơ̆ng ta pô dưm, pok măi telephôn laih anun ngă brơi hră pơar online. Ta pơčrâo brơi pô sang, hơmâo măi telephôn thâo mut ĕp hăng mơ-it tơlơi pơhing ta pô amăng bơnah ia rơgơi mrô, laih thâo hruaih, tơdơi anai, djop pô ngă mă pô sh yơh hơgĕt anŏ ta či kiăng amăng măi telephôn, hlâo kơ nao pơ sang bruă kơnuk kơna pơsir brơi”.

Tơlơi gir run, sơ̆n pran jua hăng hur har djru ba ană plơi pla ba yua ia rơgơi mrô djru hrŏm ngă pơblih ƀiă laih tơlơi pơmin, bruă mă ba tơlơi pơhing amăng plơi pla, ngă hră pơar hăng pơblih tơlơi juăt čih pơdưm hlao amăng bơnah ia rơgơi mrô. Yă H’Kơm Êban, khua plơi Ƀuôn Tah B, lăi pơtong:

“Mơnuih ƀon sang thâo ba yua măi telephôn rơgơi lĕ, pok ĕp bơnah VNeID, pơčrang gru kơnăl QT, pioh tla prăk hăng ngă hră pơar online soh. Ƀu kơnong thâo ba yua ia rơgơi đôč ôh, mơnuih ƀôn sang dŏ thâo ngă hră pơsir hơdôm bruă hơmâo hlâo kơ anun, huăi kơnang kơ mơnuih pơkŏn djru dơ̆ng tah”.

Mơ̆ng kual plơi pla, bruă ngă “Pơtô brơi mơnuih ƀôn sang thâo ba yua mrô” hlăk pok pơhai lu anih amăng tơring čar Dak Lak. Rơbêh 2000 grup hyu pơtô ba ia rơgơi mrô amăng plơi pla abih bang truh 12.000 čô ngă ding kơna hơmâo akŏ pơjing, djru ngă brơu hră pơar hăng pơtô ba mơnuih ƀôn sang ngă hră pơar online, tla prăk on amăng măi telephôn, ƀu yua prăk mơta dơ̆ng tah. Ơi Bùi Thanh Toàn, Khua Gơnong bruă Boh thâo hăng Ia rơgơi tơlơi pơhing tơring čar Dak Lak brơi thâo, tơlơi ngă hrŏm mơ̆ng khul djru ba ia rơgơi mrô amăng plơi pla, hơmâo djru ba kơ mơnuih ƀôn sang thâo ba yua ia rơgơ mrô:

“Pơblih yua mrô blung hlâo lĕ pơblih mơ̆ng tơlơi pơmin, hơdră či ngă bruă. Hrơi blan laih rơgao, khul khua mua djop plơi pla hrŏm hăng ƀing arăng đăo kơnang djru pơtô ba ia rơgơi mrô kơ mơnuih ƀôn sang, kơnang kơ hơdră anăn: să mrô, plơi pla mrô hăng mơnuih ƀôn sang mrô. Lu plơi pla prăp lui hlâo hơdră ba yua mrô amăng bruă wai lăng, pơgang plơi pla hăng tơlơi dŏ dong ƀong huă, ngă atur kơ bruă pơblih yua mrô ƀơi tơring čar amăng thun blan pơ anăp.