Jơlan hơdră bưp ƀô̆ mơta ƀing dŏ hơdip hơmâo 2 črăn anun lĕ “Tơlơi atur phun kơ pran sông kơtang” hăng “Tŏ tui tơlơi hing ang”. Jơlan hơdră hơmâo pơƀuh glăi hrơi blan plơi prong jưh jom hơdôm hrơi Đơ đam dêh čar tơgŭ hơkrŭ thun 1946, ling tơhan hăng mơnuih ƀôn sang Hà Nôi gir run blah wang amăng 60 hrơi mlăm ngă pơrai hĭ hơdră blan ngă “blah tañ, dưi tañ” mơng ayăt Prang, wai pơgang brơi anom bruă mơng Ping gah, Kơnuk kơna, ngă gêh gal kiăng abih bang mơnuih ƀôn sang yak nao thun blan blah wang sui hrơi. Ba glăi tơlơi hing ang, anai lĕ mơnuih ƀôn sang Hà Nội, ƀing ling tơhan “Amra djai drơi kiăng rơngai lŏn ia”.

Mut hrŏm blah ayăt lơm glăk dŏ anet, tơhan hơđăp Phạm Đình Luận, tơhan hơđăp amăng Khul tơhan plơi prong jưh jom, hơdor glăi: “Lơm anun kâodŏ ƀơi jơlan Hàng Bông. Ayăt Prang ñu ngă lu tơlơi sat răm kơ mơnuih ƀôn sang. Lơm đơ đam dêh čar tơgŭ hơkrŭ tui tơlơi iâu pơthưr mơng Wa, abih bang mơnuih ƀôn sang hrŏm ling tơhan, ƀing tha, čơđai, đah rơkơi đah kơmơi lêng kơ mut hrŏm blah ayăt ƀơi Hà Nội…Lơm anun kâo glăk 9 thun đôč, hăng Khul tơhan plơi prong jưh jom ƀu djơ̆ kơnong hajăn kâo lĕ anet hloh, ăt hơmâo lu mơnuih djru ba hyu tơlơi pơhing pơ khul tơhan pơkŏn dong.”

Amăng jơlan hơdră pơbưp ƀô̆ mơta, tơlơi bơră ruai glăi hơmâo pơdah hăng hơdôm tơlơi sit nik mơng ƀing dŏ hơdip, ƀing apăn bruă, ling tơhan Anom bruă git gai tơhan plơi prong jưh jom, tơlơi anai ngă pơƀuh glăi hơdôm tal blah pơgang hăng rơngĭt adai ƀơi Hà Nội amăng 12 hrơi mlăm ba truh kơ “Tal blah wang Điện Biên Phủ hăng rơngĭt” thun 1972. Tŏ tui lĕ rup rap kru tơkai yak nao amăng rơnuk rơngai mơng ling tơhan amăng pơhlôm pơgang hơjan kơthel, mă mơnuih, wai pơgang hơđong amăng rĭm plơi pla, rĭm ară jơlan. Mơng anun ngă lar hyu pran pơ-ư ang, pơtrut pran ngă bruă mơng rơnuk hlăk ai kiăng tŏ tui pran hơdip “Amra djai drơi pô kiăng rơngai lŏn ia:, tŏ tui gru grua hng ang hăng bruă mă sit nik, gum tơngan hrŏm wai pơgang rơnuk rơnua, pơjing plơi prong jưh jom Hà Nội gru grua, hiam klă, pơplih phrâo. Mut hrŏm jơlan hơdră pơbưp nao rai, ayong Nguyễn Viết Thịnh, dŏ ƀơi phương Ô Chợ Dừa brơi thâo: “Rơnuk djru wai pơgang đưm hlâo hơmâo tuh drah pơčah asar kiăng kơ wai pơgang brơi rĭm ară jơlan, rĭm boh sang. Yua anun rơnuk hlăk ai gơmơi ră anai amra yua pran hlăk ai hur har, khin hơtai hăng tơlơi thâo thăi kiăng wai pơgang hăng pơjing plơi prong jưh jom Hà Nội jai hrơi hiam klă hăng rơnuk rơnua./.