Sa hrơi mă bruă mơng amai Phan Thị Lý, mơnuih apăn bruă ƀơi anom bruă bơwih ƀong huă să Quảng Phú, tơring čar Dak Lak juăt pơphun mơng mơguah truh tlam mơmŏt. Bruă ñu ngă anun lĕ bruă prăk kak, tuh pơ alin, jŭ yap, lăi pơthâo tơlơi bơwih ƀong huă-mơnuih mơnam, čih pơkra hơdôm boh tơhan kơ bruă pơđĭ kyar…Amai Lý amra gir ngă pơgiong amăng ha hrơi mă bruă. Samơ̆ hăng tơlơi sit nik kơƀah mơnuih apăn bruă, ñu ăt djru wŏt bruă ngă hmua, ĕp lăng mrô sang anŏ ƀun rin hăng pơsir hĭ hơdôm bruă lŏn mơnai ƀơi ƀon lan. Yua anun, đa hơmâo hrơi truh 7 mông mơmŏt ñu kah mơng glăi pơ sang. “Ƀơi anih mă bruă anai hlơi hlơi lêng kơ lu bruă, kâo ră anai amra ngă 5-6 bruă, glăk ngă bruă anai arăng rơkâo ngă bruă adih, na nao tui anun yơh. Ăt ƀu thâo tơhrơi mlăm ƀudah hrơi năm, hrơi tơjuh, truh abih bruă ƀudah ƀu anăm ngă kah mơng pơdơi. Kar hăng hrơi tom brơi khŏm ngă truh 12 mông mlăm.”

Tơlơi glêh glar ƀơi ƀon lan ƀu djơ̆ kơnong hăng bruă bơwih ƀong ƀudah lŏn mơnai đôč ôh mơ̆ ăt ƀuh ƀơi hơdôm bruă ngă hră pơ-ar-mơnuih mơnam. Yă Hà Tường Vi, Khua anom bruă Jơnum min mơnuih ƀon sang să Ea Sup, tơring čar Dak Lak brơi thâo, gưl să phrâo ngă tui lu bruă mơng gưl tơring glông, ngă rah bruă tŭ mă, ngă brơi hră pơ-ar mơnuih ƀôn sang, laih dong hơdôm bruă anun lĕ pơgăn hưp ƀong kông ngăn, bruă ngă soh; sem lăng bruă pel ĕp, bruă gah rơngiao…Amăng anun hơdôm boh tơhnal phrâo, ƀing apăn bruă gưl să aka thâo pơphô bruă, aka thâo ngă tui. “Ha hrơi tŭ mă mơng 70-100 pok hră pơ-ar hăng mrô hră pơ-ar kiăng mơ-it nao ăt lu laih dong mông jơnum amăng ha wŏt hrơi tơjuh hăng hơdôm gơnong bruă, sang bruă, sang phat kơđi mơng 3-5 mông jơnum ha hrơi, lơm anun hơdôm bruă ngă hră pơ-ar, tơlơi pơkă kiăng ngă tui gưl tơring glông hlâo anun.”

Bruă kơƀah mơnuih mă bruă glăk jing bruă glăk ƀuh ƀơi hơdôm boh să, phương ƀơi tơring čar Dak Lak. Ping gah tơring čar Dak Lak pơsit tong, anai lĕ tơlơi sit nik kiăng ngă rơđah hăng hơmâo hơdră pơsir lăp djơ̆ kiăng djru brơi hơbô̆ bruă gong gai dua gưl dưi ngă bruă klă, tŭ yua tui tơlơi kiăng. Hơdră pơsir ƀơi anăp lĕ amra dưm dăp, kah pơpha mơnuih mă bruă mơng gưl tơring čar, laih dong lăng glăi bruă ĕp pơmut mơnuih apăn bruă gưl să thâo mơbruă./.