Tơdơi kơ hrơi čơkă sit nik, Khua dêh čar ơi Lê Minh Hưng hăng Khua dêh čar Saleumxay Kommasith pơphun jơnum. Dua čô khua pơthâo nao rai kơ kơđi tơlơi hơmâo ƀơi rim boh dêh čar, jơlan hơdră, tơlơi či đĭ kyar pơ anăp anai, laih anun bruă akŏ phun pok pơhai amăng mông Jơnum ping gah rim boh dêh čar.

Dua čô khua dêh čar hok mơak ƀơi anăp tơlơi đĭ kyar klă hăng abih bang mơ̆ng tơlơi rô nao rai dua bơnah thun blan rơgao; pơsit tơlơi rô nao rai yôm pơphă plah wah Việt Nam - Lao jing tơlơi kiăng ngă hlâo amăng jơlan gah pơtom hiăp rim boh dêh čar. Kơ tơlơi bơwih ƀong, dua bơnah pơtŏng glăi bruă ngă hrŏm tuh pơ alin jing bruă bang bơngač, hmư̆ hing biă amăng tơlơi rô nao rai. Việt Nam glăk hơmâo năng ai 300 kơčăo bruă tuh pơ alin pơ čar Lao, hăng prăk ngă bruă hnăng blung 7 klai USD. Dua bơnah tŭ ư gir run pơplih prong, kơtưn hloh, pơdjru nao rai, pơtruh plah wah dua kual bơwih ƀong; ngă hrŏm čih pơkra jơlan gah či ngă, hăng hơdôm bruă kiăng ngă hlâo, đah mơ̆ng hơmâo prăk pơhrui sĭ mơdrô dua bơnah hơmâo 5 klai USD. Ƀrô tal anai, Khua dêh čar ơi Lê Minh Hưng lăi pơthâo Việt Nam amra man pơdong brơi đôč kơ mơnuih ƀôn sang dêh čar Lao dua boh sang hră, nua ñu 2 klăk USD.

Tơdơi kơ mông jơnum, dua čô Khua dêh čar dŏ lăng dua bơnah Pơjao 11 pok hră ngă hrŏm gah rơnuk rơnua, tơlơi phiăn, prăk kăk, apui ayuh, pơtô hăng pơjuăt, djuai ania, tơlơi đăo hăng ngă hrŏm plah wah hơdôm boh tơring mơ̆ng dua boh dêh čar; hrŏm hăng nao lăng mông ngă Yang juă lŏn man pơdong Sang hră gưl prong giăng mah Lao - Việt./.