Ƀơi sang hră gưl prong Đà Lạt, rĭm thun hơmâo rơbêh 1.000 tơlơi kơsem min boh thâo, ring bruă, akŏ bruă hơmâo ngă tui. Lu boh than dưi mă yua anun lĕ hlong ia rơsĭ, măi mok pơkă lăng pơ-iă pơčrang, bruă pơsir hĭ djah ia klơr, hơdôm gơnam yua rông akan hơdang…Nai prin tha Trần Nhật Thiện, Khua anom bruă boh thâo phrâo hăng ngă hrŏm jar kmar, sang hră gưl prong Đà Lạt brơi thâo, mơng boh than kơsem min truh mă yua sit nik ăt dŏ ataih mơn. “Ră anai hơmâo hơdôm bruă jao yua boh thâo phrâo hăng pơplih pơčeh phrâo. Samơ̆ kiăng ngă tui hơdôm bruă jao anun, ƀing ta ăt aka ƀu klă amăng hơdôm glông pơlir hơbit 3 boh sang.”

Tui tơlơi sit nik brơi ƀuh, hơdôm bruă jao mă yua boh thâo phrâo hơmâo tơring čar Lâm Đồng pok pơhai lu hloh ăt raih daih phara; boh than kơsem min aka ƀu ba mă yua amăng hơdôm tơlơi bơwih ƀong huă. Lơm anun, anom bruă rơkâo pơplih boh thâo phrâo samơ̆ aka ƀu hơmâo mơnuih ngă bruă thâo rơgơi ƀudah hơmâo hơdră lăp djơ̆. Yă Mai Thanh Nga, kơ-iăng Khua gơnong bruă boh thâo phrâo hăng boh thâo ia rơgơi tơring čar Lâm Đồng brơi thâo, anai lĕ anŏ aka ƀu klă amăng bruă yua boh thâo phrâo, boh thâo ia rơgơi hăng pơplih pơčeh phrâo amăng ƀon lan. “Amăng hrơi blan ngă bruă gah mă yua boh thâo ia rơgơi hơmâo pok pơhai anet, raih daih, aka ƀu pơlir jing sa glông ƀudah jing sa bruă jao pơprong kiăng pơsir hĭ hơdôm bruă pơprong amăng ƀon lan.”

Mơng tơlơi sit nik anai, tơring čar Lâm Đồng glăk pơsit tong kơ bruă ngă tui phrâo: plih hĭ tơlơi tơña: “Hơmâo bruă hơget kiăng kơsem min?” hơdai nao “Ƀon lan glăk hơmâo bruă hơget kiăng pơsir hĭ?”. Anai ăt lĕ jơlan pok rai tơlơi dưi prong brơi hơdôm bruă mơ̆ Lâm Đồng hơmâo tơlơi gal, amăng anun hơmâo boh thâo sinh học. Nai tha prin, nai prin tha Dương Tấn Nhựt, kơ-iăng Khua anom bruă boh thâo tơlơi hơdip, anom bruă kơsem min boh thâo phrâo hăng boh thâo ia rơgơi Việt Nam brơi thâo, boh thâo pơčeh pơkra, pla bơmao, boh thâo mă yua tơdơi kơ pơhrui…amra ba glăi hơdôm gơnam yôm phara, amra ba glăi rơnoh yôm brơi Lâm Đồng. Samơ̆ kiăng boh thâo phrâo mơng anom bruă kơsem min tơl anih mă yua, anom bơwih ƀong kiăng mut hrom mơng bruă pơđĭ kyar gơnam tam: “Tơdah ƀing ta pơlir hơbit dong hơdôm anom bơwih ƀong sĭ mơdrô amra hơmâo dong ngăn rơnoh djru ba mơng anom bruă kơsem min truh gah rơngiao, tơlơi anai amra ngă klă ƀiă, ƀơƀrư̆ jing gơnam tam ba sĭ mơdrô.”

Nai prin tha Hà Thúc Viên, kơ-iăng Khua sang hră gưl prong Việt Đức brơi thâo, kiăng pơlir hơbit Kơnuk kơna-Sang hră-Anom bơwih ƀong sĭ mơdrô ba glăi boh than sit nik, kiăng pơsit tong tơlơi glăm ba mơng rĭm čô mơnuih. “Rĭm bơnah bơdjơ̆ nao amra hơmâo bruă jao phara. Kơnuk kơna amra hơmâo hơdră bruă, kơ bruă ngă amra ba tơbiă kiăng hơdôm boh sang hră, anom bơwih ƀong mut hrŏm ngă. Sang hră gưl prong kiăng đing nao bruă pơtô hrăm hăng kơsem min. Anom bơwih ƀong đing nao tuh pơ alin hăng gum hrŏm hơdôm anom bruă kơsem min ngă lông lăng tơdơi anun amra ba sĭ mơdrô gơnam.”

Hăng tơring čar Lâm Đồng, hơdôm tơlơi kiăng ngă pơlir hăng hơdôm gơnong bruă bơwih ƀong huă hơmâo tơlơi dưi gah bruă ngă hmua yua boh thâo phrâo, ngă kơphê, añam tam, bơnga, boh troh, kyâo jrao, rông hlô hăng pơkra gơnam đang hmua; bơwih ƀong kual ia rơsĭ, mă akan hơdang; tuai čuă ngui, apui lơtrik pơkra glăi hăng pơkra gơnam amăng atur lŏn. Ơi Nguyễn Ngọc Phúc, kơ-iăng Khua Jơnum min mơnuih ƀon sang tơring čar Lâm Đồng brơi thâo, kiăng hơdôm tơlơi dưi anun jing bruă bơkơtưn, ƀon lan amra pơplih kơtang mơng akŏ bruă kơsem min hơdai nao rơkâo ngă tui tơlơi sit nik: “Mơng tơlơi rơkâo mơng anom bruă bơwih ƀong, ƀing gơmơi amra rơkâo glăi hơdôm sang hră gưl prong, hơdôm anom bruă kơsem min hăng ƀing gơmơi amra jing mơnuih gum hrŏm, jao prăk mă yua kah hăng hơdôm bruă git gai wai lăng ngă hiưm pă dưi pơkra rai gơnam hăng gơnam anun dưi ba sĭ mă yua.”

Tui akŏ bruă rơwang thun 2026-2030, Lâm Đồng amra pok pơhai glông pơplih pơčeh phrâo, pơlir Kơnuk kơna, ƀing kơhnâo hăng anom bơwih ƀong sĭ mơdrô kiăng pơsir hĭ hơdôm bruă sit nik. Anai ăt lĕ bruă ngă tui tơlơi pơtrun mrô 57 mơng Ding jum kơđi čar; ba boh thâo phrâo, boh thâo ia rơgơi hăng pơplih pơčeh phrâo jing tơlơi pơtrut phun amăng pơđĭ kyar. Mơng rơkâo kơsem min truh ba sĭ mơdrô, hơnong pơkă rơnuč lĕ pơkra rai gơnam tam, hrưn đĭ rơnoh hăng dưi bơkơtưn amăng bơwih ƀong ƀơi ƀon lan./.