Khua anom bruă Ƀirô Khua pơ ala mơnuih ƀôn sang dêh čar hơđăp Bùi Ngọc Thanh lĕ mơnuih hơmâo thun blan mă bruă hăng Khua git gai pơ ala mơnuih ƀôn sang dêh čar ơi Nguyễn Phú Trọng mơng tal 11, hăng ơi Thanh, Khua git gai pơ ala mơnuih ƀôn sang dêh čar ơi Nguyễn Phú Trọng hơdip jê̆ giăm, bă blai pran khăp pap:

“Amăng hơdôm hrơi blung Khua git gai pơ ala mơnuih ƀôn sang dêh čar phrâo jao bruă, Khua anom bruă hăng Khua git gai pơ ala mơnuih ƀôn sang dêh čar juăt mă bruă pơhrua lu wŏt, kâo hơdor blan 8/2006, amăng mông pơphun jơnum Jơnum min apăn bruă Khua pơ ala mơnuih ƀôn sang lok 42, yua bơngŏt kơ bruă mă đơi, yang hrơi dong kâo nao tơña lăng ñu dong. Mah lơm anun anih mă bruă mơng Khua pơ ala mơnuih ƀôn sang anet đôč, samơ̆ ƀing gơmơi ăt pơhlôm brơi anih mă bruă kơ Khua git gai pơ ala mơnuih ƀôn sang dêh čar hơmâo wŏt anih pơdơi amăng yang hrơi dong hăng hơmâo anih čơkă tuai. Lơm kâo nao pơ anih pơdơi yang hrơi dong ƀu ƀuh Khua git gai pơ ala mơnuih ƀôn sang dêh čar, mut nao pơ anih čơkă tuai ăt ƀu ƀuh lơi, lơm nao pơ anih mă bruă ƀuh Khua git gai pơ ala mơnuih ƀôn sang dêh čar glăk đih amăng sưng hrua mă, ñu dŏ pơđok hră. Kâo tơña Khua git gai pơ ala mơnuih ƀôn sang dêh čar, yua hơget gưt đih pơ sưng mơ̆ đih ƀơi anai, tơdơi anun kah thâo ñu brơi glăi anih pit đih anun kiăng kơ ngă anih mă bruă. Ñu lĕ sa čô mơnuih hơdip mơ-ak, jê̆ giăm. Kâo juăt sơñ ñu lĕ sa čô khua mua pơprong hơdip mơ-ak jê̆ giăm biă mă”.

Mơng tơlơi hơdip jê̆ giăm anun kơđŏm glăi hăng Khua jơnum min djop bruă mơnuih mơnam mơng Ƀirô Khua pơ ala mơnuih ƀôn sang dêh čar Nguyễn Thị Hoài Thu hăng Khua git gai pơ ala mơnuih ƀôn sang dêh čar ơi Nguyễn Phú Trọng, anun lĕ sa čô mơnuih ba gru hơdip tơbiă mơng mơnuih ƀôn sang, mơng mơnuih ƀôn sang đĭ ngă bruă:

“Amăng hơdôm mông bưp mơnuih ƀôn sang aka ƀu ƀuh ơi Nguyễn Phú Trọng đĭ dŏ hăng glông lăng trun abih bang mơnuih poh tơngan, mơ̆ ñu mơng yŭ rơbat đĭ, mă tơngan mơnuih dua bơnah. Tơdơi anun mah đĭ dŏ gah glông hmư̆, lăi glăi. Anai lĕ pran hơdip tơbiă mơng mơnuih ƀôn sang, ƀu djơ̆ đĭ dŏ hăng glông git gai”.

Hơmâo 2 rơwang mă bruă hrŏm hăng Khua git gai pơ ala mơnuih ƀôn sang dêh čar ơi Nguyễn Phú Trọng, Khua pơ ala mơnuih ƀôn sang Trần Thị Hoa Ry, Kơ-iăng khua khul djua ania mơng Ƀirô Khua pơ ala mơnuih ƀôn sang dêh čar hơdor na nao ñu lĕ sa čô mơnuih jê̆ giăm hăng rơgơi kơhnâo, kjăp bruă lơm đĭ ngă khua amăng lơ 26 blan 6 thun 2006:

“Đĭ pơhiăp lơm đĭ ngă Khua git gai pơ ala mơnuih ƀôn sang dêh čar, ñu hơmâo dua tơlơi pơhiăp yôm phăn “Pơmĭn pô lĕ mơnuih hơdip truh hơbin. Ăt aka ƀu thâo wil do hiưm pă lơi”, Ñu mă Kiều kiăng pơdah pran jua ñu pô, ƀing ta ƀuh ñu lĕ mơnuih thâo pơmĭn, luă gŭ, amra pơhrăm ñu pô lơm hơmâo arăng jao bruă yôm phăn anai hăng ăt lĕ tơlơi ƀuăn gir run hăng gơgrong mơng ñu hăng Ping gah, Khua pơ ala mơnuih ƀôn sang dêh čar hăng mơnuih ƀôn sang”.

Ƀing Khua pơ ala mơnuih ƀôn sang mă bruă amăng rơwang 11 hăng 12 lêng kơ hơmâo tơlơi kơđŏm glăi yôm phăn hăng Khua git gai pơ ala mơnuih ƀôn sang dêh čar ơi Nguyễn Phú Trọng. Kơ-iăng Khua pơ ala mơnuih ƀôn sang hơđăp tơring čar Thanh Hoá rơwang tal 12 Lê Văn Cuông ăt ol kơdol bơră ruai glăi hơdôm tal git gai mông tơña hăng lăi glăi mơng Khua git gai pơ ala mơnuih ƀôn sang dêh čar ơi Nguyễn Phú Trọng:

“Ñu brơi kâo tơña Khua ding jum truh pơ 3 wŏt lơm kâo abih tơlơi tơña ñu kah brơi pơdơi. Lơm ƀuh Khua ding jum dŏ sư̆ rơbư̆ amăng tơlơi lăi glăi ñu ăt črâo ba kiăng Khua ding jum đing nao djơ̆ tơlơi tơña. Yua anun, mông tơña hăng lăi glăi ăt pơhlôm djơ̆ tơlơi kiăng, hur har pran jua hăng lu tơlơi tơña hăng lăi glăi, hơmâo lu mơnih kiăo tui lăng. Ñu git gai mông jơnum tong ten, dơlăm, rơgơi hloh hăng huăi ngă prong bruă, ngă gêh gal brơi Khua pơ ala mơnuih ƀôn sang dêh čar dưi pơdah djơ̆ tơlơi glăm ba, kah hăng ngă gêh gal brơi ƀing khua ding jum lơm lăi glăi lêng dŏ dong hơđong, lăi glăi djơ̆ ngă kơ lu mơnuih đăo gơnang”.

Hăng sa Khua pơ ala mơnuih ƀôn sang tal blung a mut hrŏm anom bruă pơ ala mơnuih ƀôn sang Phạm Nam Tiến, Khua pơ ala mơnuih ƀôn sang tơring čar Dak Nông, Khua git gai Ping gah dêh čar ơi Nguyễn Phú Trọng lĕ mơnuih ba gru hiam kiăng ƀing Khua pơ ala mơnuih ƀôn sang dêh čar hrăm tui:

“Khua git gai Ping gah lêng kơ jê̆ giăm, đing tơngia hmư̆ tơlơi rơkâo, pơgôp hiăp mơng mơnuih ƀôn sang. Hăng yôm hloh lĕ Khua git gai Ping gah lơm hơmâo tơlơi git gai amra ngă tui mơtăm. Anai lĕ kiăng djă pioh pran đăo gơnang hăng sa čô khua apăn akŏ, mơng Khua pơ ala mơnuih ƀôn sang ƀơi anăo mơnuih ƀôn sang.

Lơm ngă Khua git gai pơ ala mơnuih ƀôn sang dêh čar rơwang tal 11, 12, ơi Nguyễn Phú Trọng lêng kơ pơlir hăng bruă amăng Ƀirô Khua pơ ala mơnuih ƀôn sang dêh čar, hluh rơđah kơ bruă pơphun, hơdră bruă mă mơng Ƀirô Khua pơ ala mơnuih ƀôn sang dêh čar hăng hơdôm tơlơi kơđŏm glăi yôm phăn:

- Tŏ tui khua mua hlâo anun, blan 6/2006, lơm ngă Khua git gai pơ ala mơnuih ƀôn sang dêh čar rơwang tal 11, ơi Nguyễn Phú Trọng hơmâo git gai kjăp bruă mă kiăng Ƀirô Khua pơ ala mơnuih ƀôn sang dêh čar pơgiong djop bruă jao amăng rơwang mă bruă. Amăng ha thun git gai, Ƀirô Khua pơ ala mơnuih ƀôn sang dêh čar hơmâo tŭ yap mă yua 13 tơlơi phiăn, 11 tơlơi pơtrun, amăng anun, hơmâo 3 tơlơi pơtrun yôm phăn, anun lĕ tơlơi pơtrun tŭ yap tơlơi pơsit mut hrŏm khul pơkôl akŏ pơjing Grup sĭ mơdrô rŏng lŏn tơnah (WTO) mơng dêh čar Cộng hòa xã hội chủ nghĩa Việt Nam; tơlơi pơtrun kơ akŏ bruă pơjing Ƀirô Khua pơ ala mơnuih ƀôn sang dêh čar; hăng tơlơi pơtrun kơ bruă man pơkra hơdôm rung bruă yôm phăn hơmâo hyuh-apui lơtrik-đạm Bà Rịa -Vũng Tàu.

- Rơwang mă bruă tal XII Khua pơ ala mơnuih ƀôn sang dêh čar, hơmâo tŭ yap 67 tơlơi phiăn, 13 tơlơi pơtrun. Amăng anun hơmâo lu tơlơi phiăn ngă atur brơi kơ bruă pơsir tơlơi ngă soh hưp ƀong kông ngăn, bruă ngă soh tơdơi anai, anun lĕ tơlơi phiăn čih pơkra glăi, pơhrua sa, dua tơlơi amăng Črăn tơlơi phiăn pơsir kơđi tơlơi, tơlơi phiăn čih pơkra, pơhrua sa, dua črăn amăng Črăn tơlơi phiăn hình sự, tơlơi phiăn pơsir kơđi tơlơi, tơlơi phiăn pok mơnă hlâo thun pơkă, tơlơi phiăn wai lăng, mă yua lŏn mơnai mơng Kơnuk kơna….

- Khua pơ ala mơnuih ƀôn sang dêh čar rơwang tal 12 hơmâo tơlơi pơplih prong amăng bruă pơphun, lu tui Khua pơ ala mơnuih ƀôn sang, hơdôm anom bruă mơng Ƀirô Khua pơ ala mơnuih ƀôn sang dêh čar, mơng 8 anom bruă anun lĕ hơdôm rơwang mă bruă hlâo anun hơmâo đĭ 10 Jơnum min.

- Rơwang mă bruă tal 12, hăng tơlơi git gai khut khăt mơng Khul pơphun plĕ hră ruah khua dêh čar, Khua apăn akŏ lĕ Khua git gai pơ ala mơnuih ƀôn sang dêh čar ơi Nguyễn Phú Trọng hrŏm hăng djop anih anom pơphun plĕ hră đơ đam dêh čar, tal blung a pơphun ha amăng plĕ ruah Khua pơ ala mơnuih ƀôn sang dêh čar (tal XIII) hăng plĕ hră ruah Khua khul pơ ala mơnuih ƀôn sang 3 gưl (rơwang thun 2011-2016) hơmâo pơphun truh kih. Tal plĕ hră anai tañ ƀiă, pơkrem, gêh gal brơi mơnuih ƀôn sang hăng ngă atur kjăp brơi kơ hơdôm tal plĕ hră tơdơi dong.

Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong, Khua git gai Ping gah dêh čar ơi Nguyễn Phú Trọng lĕ sa čô mơnuih rơgơi kơhnâo, kjăp bruă mă, hơmâo tơlơi pơmĭn pơplih phrâo, sit nik djop mơta, hơmâo lu tơlơi pơmĭ prong phara hăng tơlơi pơmĭn hơđăp. Hăng 80 thun hơdip, 57 thun mut Ping gah, ñu pioh ha rơnuk hơdip yua kơ tơlơi pơmĭn hiam klă mơng Ping gah, ñu lĕ sa čô mơnuih ba gru hiam tui kơnuih ngă hơkrŭ mơng sa čô mơnuih Cộng sản, jing sa čô khua git gai rơgơi kơhnâo mơng Ping gah, ha rơnuk hơdip tuh rơyuh pran pran jua yua kơ tơlơi rơngai djuai ania hăng chủ nghĩa xã hội, yua kơ tơlơi yâo mơ-ak mơnuih ƀôn sang:

“Hăng tơlơi gơgrong lĕ Khua apăn akŏ prong hloh mơng Ping gah, ngă lu bruă mơ̆ Ping gah, Kơnuk kơna jao amăng anun hơmâo ngă Khua git gai pơ ala mơnuih ƀôn sang dêh čar rơwang tal 11, 12, ñu lêng kơ pơlir hăng Ƀirô Khua pơ ala mơnuih ƀôn sang dêh čar, hluh rơđah kơ bruă pơphun, bruă mă mơng Ƀirô Khua pơ ala mơnuih ƀôn sang dêh čar. Ñu juăt pơtă pơtăn abih bang mơnuih pioh lu hrơi mông mă bruă amăng Ƀirô Khua pơ ala mơnuih ƀôn sang dêh čar, kiăng thâo hluh dơlăm, tong ten kơ bruă amăng Ƀirô Khua pơ ala mơnuih ƀôn sang dêh čar kiăng pơgôp hiăp, pơkhă nao rai brơi djơ̆ hloh. Ñu pơtă pơtăn: hrăm tui mơnuih ƀôn sang, hrăm tui tơlơi sit nik, hơdră bruă, tơlơi phiăn hơmâo pơtrun, anăm ataih mơng tơlơi hơdip sit nik, hơtai boh ƀing ta poh tui tơlơi hơdip, mơng hơtai boh mơnuih ƀôn sang, mơng anun kah bruă amăng Ƀirô Khua pơ ala mơnuih ƀôn sang dêh čar amra pơhlôm tŭ yua./.