Khul Ping gah plơi Đăk Ga, să giăm guai Đăk Nhoong, tơring glông Đăk Glei, tơring čar Kon Tum hơmâo 23 čô mơnuih apăn bruă Ping gah hăng abih bang lĕ mơnuih djuai ania Jeh-Triêng. Mơng bruă jê̆ giăm ană plơi pla, ba jơlan hlâo mơng ƀing apăn bruă Ping gah, 112 boh sang anŏ hăng giăm 360 čô mơnuih amăng plơi Đăk Ga mut hrŏm amăng bruă wai pơgang guai lŏn ia. Hăng pran jua thâo djru tơdruă, djru pơđĭ kyar bơwih ƀong huă brơi kkơ ană plơi pla lêng kơ tŏ tui na nao. Khua git gai Ping gah ngă rah khua plơi A Cu brơi thâo, rĭm thun mơnuih apăn bruă Ping gah lêng kơ ƀuăn hăng hơmâo akŏ bruă tong ten ngă tui boh tơhnal hrăm hăng ngă tui gru hơdip mơng wa Hô. Bơ A Cu ăt kah hăng mơnuih apăn bruă Ping gah pơkŏn amăng khul Ping gah lêng kơ ƀuh bruă hrăm hăng ngă tui gru hơdip mơng wa Hô jê̆ giăm, sit nik.

“Rĭm hrơi kâo lêng kơ hrăm hăng ngă tui gru hơdip, bruă mă mơng wa Hô, anun lĕ hrăm tui hơdôm tơlơi klă hiam. Hrăm tui wa bruă pơkrem yua prăk kak rĭm hrơi. Laih dong hrăm amăng tơlơi pơhiăp, bruă mă, pơtrut neh met wa pơđĭ kyar bơwih ƀong huă amăng sang anŏ kiăng pơklaih mơng ƀun rin hơđong kjăp”.

Thun 2023  pok pơhai ngă tui akŏ bruă mơng Ping gah tơring čar Kon Tum amăng bruă “Hrăm hăng ngă tui tơlơi pơmĭn, bruă mă, tơlơi hơdip mơng Khua mir sir Hồ Chí Minh abih pran jua djru pơjing tơring čar Kon Tum pơđĭ kyar tañ hăng hơđong kjăp”, djop khul Ping gah amăng ƀon lan kual mơnuih djuai ania ƀiă amăng tơring čar Kon Tum hơmâo lu hơdră hrăm hăng ngă tui wa Hô lăp djơ̆ hăng tơlơi sit nik amăng rĭm boh ƀon lan. Kơ-iăng khua git gai Ping gah A Vét, djuai ania Hrê, plơi Vi Ô Lắk, să Pờ Ê, tơring glông Kon Plông brơi thâo, lơm ƀuh mơnuih ƀôn sang amăng plơi pla aka thâo amăng bruă rông hlô hăng ngă hmua pơdai, ñu amra djru brơi bruă ngă hmua hăng tơlơi čang rơmang djru brơi neh met wa pơđĭ kyar bơwih ƀong huă:

“Tui tơlơi pơtô mơng wa Hô lĕ Ping gah kiăng ba gru, ba jơlan hlâo kiăng mơnuih ƀôn sang ƀuh hăng ngă tui. Pok phun lĕ bruă rông hlô mơnong, kâo ăt kơsem min, pel ĕp, pơtô pơblang brơi mơnuih ƀôn sang rông hlô mơnong kiăng pơkra drông war, pơhlôm agaih rơnăk kiăng pơgang klin kman. Ngă hmua pơdai kâo ăt pel ĕp kiăng yuă hơpă lu hloh črâo brơi neh met wa dong”.

Anai lĕ sa amăng hơdôm čô mơnjih apăn bruă Ping gah djuai ania ƀiă ba gru hơmâo pơpŭ bơni amăng Jơnum lăng glăi bruă ngă tui tơlơi klah čun mrô 01 mơng Ding jum kơđi čar kơ bruă tŏ ngă tui tơlơi črâo trun mrô 05 mơng Ding jum kơđi čar “kơ bruă pơtrut hrăm hăng ngă tui tơlơi pơmĭn, bruă mă, gru hơdip mơng Hồ Chí Minh” thun 2023-2024 yua Ping gah tơring čar Kon Tum pơphun ƀrô tal hơdor hrơi tơkeng wa Hô blan 5 laih rơgao, Kơ-iăng khua git gai Ping gah ngă rah Khua plơi A Huế, djuai ania Xơ Đăng, dŏ amăng plơi Kon Nhên, să Đăk Ruồng brơi thâo:

“Hrăm hăng ngă tui tơlơi pơmĭn, gru hơdip mơng Hồ Chí Minh, kâo pô lêng kơ pơtrut pơsur neh met ngă pơgiong bruă man pơdong plơi pla phrâo. Kâo pô ăt pơsur neh met wa djru hrơi mă bruă, pơhlôm anih dŏ hơdip jum dar agaih rơnăk ƀơi sang drông, pơsur neh met wa pơčruih prăk kak kiăng pơkra ming jơlan glông. Pla kyâo rôk jơlan prong kah hăng hơdôm ară jơlan amăng plơi pla, Tui tơlơi sit nik ră anai, ƀuh mơnuih ƀôn sang jai hrơi pơplih phrâo”.

Mơng bruă hrăm hăng ngă tui gru hơdip mơng wa Hô, 3 thun rơgao mơnuih apăn bruă amăng hơdôm boh tơring glông, să amăng tơring čar Kon Tum hơmâo pơjing rơbêh 800 hơbô̆ bruă gum djru, djru tơdruă pơđĭ kyar bơwih ƀong huă, pơplih pơkra đang hmua, lui hĭ tơlơi phiăn ƀu klă hiam…Mơng hơbô̆ bruă anai rơbêh 6.300 boh sang anŏ djuai ania ƀiă ƀun rin hăng rơbêh 3.300 boh sang anŏ ƀun rin hơmâo djru brơi pơjeh phun pla, boh thân pla pơjing kiăng pơđĭ kyar bơwih ƀong huă. Kơ-iăng khua khul apăn bruă Ping gah tơring glông Ngọc Hồi Phạm Hải Châu brơi thâo, Ping gah tơring glông lêng kơ pơsit tong bruă hrăm hăng ngă tui gru hơdip wa Hô lĕ bruă kơđi čar yôm phăn. Anai ăt lĕ bruă yôm kiăng pơplih ƀô̆ mơta plơi pla mơ̆ mơnuih djuai ania ƀiă dưm dưm giăm 60% mrô mơnuih amăng tơring glông:

“Bruă ngă tui gru hơdip mơng wa hơmâo pơplih tơlơi pơmĭn bruă mă hăng hơmâo tơlơi mut hrŏm, tơlơi gir run mơng Ping gah ngă tui bruă jao kơđi čar, bơwih ƀong huă-mơnuih mơnam, wai pơgang rơnuk rơnua hăng pơjing Ping gah hăng anih anom kơđi čar. Hơkrŭ pran đăo gơnang mơng mơnuih ƀôn sang hăng Ping gah. Bruă pơphun ngă tui boh tơhnal hrăm hăng ngă tui tơlơi pơmĭn, bruă mă, gru hơdip mơng Hồ Chí Minh jai dơlăm, hơmâo lu hơbô̆ bruă, bruă mă klă, ba glăi tŭ yua hơmâo pơphun hăng pok prong”.

Ngă lar hyu bruă hrăm hăng ngă tui gru hơdip mơng wa Hô, djop khul Ping gah amăng kual djuai ania ƀiă ƀơi tơring čar Kon Tum hơmâo pơgôp prong pri amăng ngă tui hơdôm hơnong pơkă pơđĭ kyar Ping gah tơring čar Kon Tum anun lĕ: hrưn đĭ klă dong amăng man pơdong plơi pla phrâo, pơhrŏ trun ƀun rin hơđong kjăp; ngă ba glăi tŭ yua amăng pơtrut “Pơplih tơlơi pơmĭn, bruă mă mơng kual mơnuih djuai ania ƀiă, kiăng mơnuih djuai ania ƀiă hrưn đĭ pơklaih mơng ƀun rin hơđong kjăp”…Bruă ngă tui klă bruă hrăm hăng ngă tui tơlơi pơmĭn, bruă mă, gru hơdip mơng Hồ Chí Minh mơng mơnuih apăn bruă Ping gah ba glăi tơlơi pơhưč, lar hyu djop anih kơ tơlơi yôm mơng bruă hrăm hăng ngă tui wa Hô ƀơi kual mơnuih djuai ania ƀiă ƀơi tơring čar Kon Tum./.