Amăng 6 blan akŏ thun 2024, Gia Lai rơnoh pơđĭ kyar amăng đơ đam tơring čar hơmâo 3%; prăk duh jia pơhrui glăi hơmâo 3.300 klai; bruă sĭ mơdrô hăng tač rơngiao hruaih tŭ yua, prăk pơhrui glăi hơmâo 525 klăk USD, dưi ngă djop 70% akŏ bruă jao sa thun; hơmâo 3 boh sang bruă gưl tơring glông hăng 96 boh să, ngă djơ̆ tơhnal pơkă plơi pla phrâo. Ră anai, ƀơi tơring čar hơmâo rơbêh 255.000 ha hmua đang phun pla djop mơta ngă djơ̆ hnong pơkă rơgoh VietGap, GlobalGap, 4C, Organic, Rainforest Alliance, FLO hăng 227 gru mrô pơkă kual pla pơjing brơi kơ 9.600 ha phun pla.

Laih dơ̆ng, hơmâo 92 kơčăo bruă čem rông hlô mơnong tŭ ư laih hơdră tuh pơ alin. Mah hnun, tơring čar ăt dŏ lu tơlơi tơnap tap kah hăng : bruă čan prăk dŏ kaih, kiah tŭ mă 23% amăng rơnoh prăk brơi čan rơbêh 4.300 klai; bruă pla kyâo amăng glai aka ngă djơ̆ tơhnal pơkă ôh. Jơnum lok 19 khua mua pơ ala mơnuih ƀôn sang tơring čar Gia Lai pơphun amăng 3 hrơi, sem glăi, pơsit 32 pok hră pơtrun yua kơ khua mua phun pơ ala mơnuih ƀôn sang hăng jơnum min mơnuih ƀôn sang tơring čar ba tơbiă.