Jơnum ngui mơak bruă boh sầu riêng Krông Pač-Dak Lak tal II amra ngă mơak pơhưč pran jua ƀing tuai rơnguai lu hăng prong hloh, amra hơmâo lu mơta bruă mă, tơlơi ngui ngor mơak, tŭ yua, anai lĕ tơlơi pơsit mơ̆ng khua mua git gai tơring glông Krông Pač-Dak Lak ƀơi mông jơnum lăi pơthâo hăng čih tơlơi pơhing pơphun jơnum ngui kơ bruă Sầu riêng Krông Pač-Dak Lak tal II thun 2024, hơmâo pơphun jơnum lăi pơthâo mơguah lơ 18/7.Hăng akŏ “Sầu riêng Krông Pač-Pơđĭ kyar hăng mut phung”, jơnum ngui mơak pơphun mơ̆ng lơ 31/8 truh abih lơ 2/9/2024.

Yă Ngô Thị Minh Trinh-Kơ-iăng Khua Jơnum min mơnuih ƀôn sang tơring glông Krông Pač brơi thâo, đơ đam tơring glông hơmâo năng ai 8.000 ha đang boh sầu riêng, dưm dưm hăng 1/3 đơ đam sầu riêng amăng tơring čar Dak Lak. Bơyan pĕ boh sầu riêng thun anai, him lăng amra hơmâo rơbêh 92.00o tơn. Sầu riêng jing phun pla ba glăi boh tŭ yua phun kơ mơnuih ngă hmua ƀơi tơring glông. Jơnum ngui bruă sầu riêng tơring glông Krông Pač tal dua, amra hơmâo hơdră pơphun jơnum prong hloh, dưi pơphun djơ̆ rơ-ua, lu bruă mă ngui ngor mơak hloh, kiăng pơpŭ bơni kơ mơnuih ngă hmua pla boh sầu riêng hăng hơdôm rơnoh yôm mơ̆ng pơjeh phun pla anai ba glăi kơ mơnuih ngă hmua.