Khua dêh čar pơtong sit, tơlơi rô nao rai plah wah Việt Nam hăng Brazil truh ră anai, hơmâo ngă djop 5 mơta tơlơi djơ̆ hrŏm, pơhrua nao bruă phun yom kah hăng : hơmâo tơlơi pơmin kiăng djơ̆ hrŏm, đăo kơnang tong ten, hơmâo gru grua hiam jĕ giăm biă mă; atur tơlơi bơwih ƀong huă pơdjru nao rai hăng pơtrut tơdruă pơđĭ kyar hrŏm; hơmâo hrŏm tơlơi kiăng rơnuk rơnua hrưn đĭ kơtang.

Khua dêh čar lăi pơtong hơdôm tơlơi pơmin djơ̆ hrŏm tui anun, tơlơi rô nao rai Việt Nam-Brazil thun blan rơgao hơmâo lu yak rơbat pơđĭ kyar klă amăng lu bruă mă, amăng anun dua bơnah dêh čar hơmâo brơi lu gưl khua mua čuă jơmư trư găn nao rai, tơlơi bơwih ƀong huă, sĭ mơdrô ăt kơjăp hơđong, laih dơ̆ng, dua bơnah ngă hrŏm tong ten amăng mông jơnum prong lu dêh čar. Pơdah rai pran jua tŭ ư hrŏm hăng tơlơi pơhiăp mơ̆ng Khua dêh čar ơi Phạm Minh Chính, Khua mir sir dêh čar Brazil ơi Lula da Silva, ăt pơsit hrŏm pok pơhai ngă tui hơdôm hơdră kiăng kơtưn hloh bruă giăng mah dua bơnah dêh čar pơ anăp adih, kah hăng brơi khul khua mua djop gưl čuă jơmư, hrăm nao rai tơdruă tơlơi thâo thăi, biă mă ñu khua mua pơprong gưl dêh čar; hơdai gum hrŏm pok pơhai tŭ yua hloh ngă tui djop mơta hră pơar hơmâo kĭ pơkôl laih.