Đĭ pơhiăp amăng jơnum 6 blan rơnuč thun, ječ ameč pơgiong hră pơ-ar pơkă tong ten ngă tui tơlơi phiăn pơplông, pơpŭ bơni thun 2022. Jao ding jum phiah phiăn git gai, gum hrŏm hăng Ding jum wai lăng djop anom bruă pơtrut pơsur djop ƀon lan pơjing, hơmâo tơlơi pơtrun črâo ba ngă tui tơlơi phiăn pơplông, pơpŭ bơni djơ̆ hăng tơlơi pơkă, tơlơi glăm ba.

Khua dêh čar jao Ding jum wai lăng git gai, gum hrŏm hăng djop anom bruă bơdjơ̆ nao pơgiong, mơ-it nao Khua dêh čar hơmâo tơlơi pơtrun tŭ yap akŏ bruă pơphun pơplông khăp kơ lŏn ia đơ đam dêh čar tal XI; pơphô bruă brơi Khua dêh čar, Khua khul ba tơbiă tơlơi črâo trun bruă pơplông pioh čơkă hơdôm hrơi jơnum prong Ping gah djop gưl, anăp nao Jơnum Ping gah dêh čar dêh čar tal XIV. Khua dêh čar jao Ding jum wai lăng djop anom bruă, Ding jum wai lăng jơlan glông gum hrŏm hăng djop ding jum, gơnong bruă, anom bruă, gong gai ƀon lan pơphun hăng ngă tui klă tal pơplông “500 hrơi mlăm gir run abih pran jua, gir run kơtang ƀiă dong, pơplông man pơkra giong hơdôm ară jơlan rơdêh đuăi hmar”.