Ƀơi mông jơnum, Khul khua pơphun bruă hơmâo jao gru kơnăl pơpŭ bơni brơi 190 boh sang bruă sĭ mơdrô hơmâo gơnam sĭ mơdrô hiam klă djơ̆ tơhnal pơkă djă anăn dêh čar Việt Nam thun 2024. Pơhiăp ƀơi mông jơnum, Khua dêh čar ơi Phạm Minh Chính rơkâo, djop sang bruă dưi ngă djơ̆ tơhnal pơkă gưl dêh čar lăi pha, khul ngă bruă bơwih ƀong sĭ mơdrô, mơnuih ngă bruă mơdrô Việt Nam hnun mơ̆n kiăng djă hơnơ̆ng kơjăp boh tơhnal dưi ngă rơnoh yom kah hăng aliăng phun: Boh tŭ yua-Pơblih-Pơčeh phrâo-Tơlơi thâo kơsung nao pơ anăp.

Thun blan pơ anăp, Khua dêh čar pơtrun hiăp, djop sang bruă mơdrô kiăng kơtưn na nao ƀu pơdơi ôh, pơtum ngă tui anŏ gêh găl pơđĭ kyar mơtah hăng hơđong kơjăp; kơsung nao hlâo amăng bruă pơblih ngă tui hơdră mơtah; hơneč mă anŏ gêh găl kơnuih djă anăn dêh čar, laih dơ̆ng ngă hrŏm akŏ pơjing čih anăn gơnam sĭ mơdrô hiam klă djă anăn dêh čar Việt Nam; hủ rhar hloh hơduah ĕp, pok pơhư prong anih anŏm sĭ mơdrô ƀơi jar kmar hăng ngă hrŏm lu hloh amăng ruăi ba gơnam sĭ mơdrô ƀơi rŏng lŏn tơnah.