Pơhiăp amăng mông bưp, Khua dêh čar ta ơi Phạm Minh Chính pơdah pran jua mơ-ak, ol kơdol pran jua hmâo bưp ƀing gơyut lăng jê̆ giăm, pơđao pran jua mơ̆ng mơnuih ƀôn sang Việt Nam, mơnuih hmâo tŭ mă, rông ba hăng ƀu pơdơi gum hơgôp, tuh rơyuh pran jua kơ tơlơi rô nao rai dua bôh dêh čar Việt Nam – Hàn Quốc amăng rơbêh kơ 30 thun rơgao.

Pơ ala kơ Gong gai dêh čar, Khua dêh čar bơni abih bang pran hơdôm khul grŭp, mơnuih, ƀing gơyut Hàn Quốc yua kơ tơlơi kiăng khăp, tơlơi dŏng yua hăng hơdôm tơlơi gir run pioh kơ Việt Nam; hrŏm hăng anun lăi rơđah pran jua, tơlơi pơpŭ mơ̆ng mơnuih ƀôn sang Việt Nam, grŭp pơ ala kơ Việt Nam hăng lŏn ia, mơnuih ƀôn sang Hàn Quốc. Khua dêh čar pơtŏng sit, Ping gah, Kơnuk kơna Việt Nam lăng yôm phăn biă tơlơi rô nao rai hăng Hàn Quốc. Hluai tui gru ngă tui sa jơlan gah pơtom hiăp rơngai, gơgrong pô, rơnuk rơnua, giăng mah, gum hrŏm hăng pơđĭ kyar, pơplih lu bơnah, lu mơta, Việt Nam lăng yôm tơlơi rô nao rai hăng Hàn Quốc hăng čang rơmang ba bruă gum hrŏm dua bôh dêh čar hmâo dong yak pơplih sit nik, ba glăi bôh tơhnal hăng sui thun lăp djơ̆ hăng tơlơi rô nao rai gum hrŏm abih bang./.