Amăng mông tŭ jum, Khua dêh čar ta ơi Phạm Minh Chính pơtŏng sit Malaysia jing bơnah gum hrŏm yôm phăn mơ̆ng Việt Nam, biă ñu gah bruă sĭ mơdrô, tuh pơplai, hơdôm bôh anom bơwih ƀong Malaysia jai hrơi jai gum hrŏm tuh pơplai lu hăng ba glăi bôh tơhnal ƀơi dêh čar Việt Nam.

Khua dêh čar ta rơkâo dua bơnah lăi pơthâo nao rai tơlơi găn rơgao, gum hrŏm čih pơkra hơdră pơkă, hơdră bruă gum djru, pơđĭ dlông bôh thâo wai lăng, pơtô glăi hơdră mă yua măi mok, pơtô juăt mơnuih mă bruă kơjăp hloh, biă ñu amăng bruă phrâo rŭ đĭ; pơtrut gum hrŏm kơplah wah hơdôm bôh anom bơwih ƀong dua bơnah ba glăi bôh tơhnal hloh, pơtrut bơkơtuai mơnuih ƀôn sang, gum hrŏm gah bruă tuai čuă ngui, bôh thâo kơtang hloh hăng hơdôm tơlơi pơkă klă./.