Ƀrô tal hơdor glăi 77 thun hrơi tơhan rơka-tơhan djai pơsăn drơi, tom brơi (8/7), Khua git gai pơ ala mơnuih ƀôn sang dêh čar ơi Trần Thanh Mẫn nao čuă, ƀơk gơnam brơi hơdôm boh sang anŏ  tơhan rơka, tơhan djai pơsăn drơi, sang anŏ djru hơkrŭ ƀơi tơring glông Anh Sơn, tơring čar Nghệ An; nao tŭi ñang hơ-ŭ hơdor Khua mir sir Hồ Chí Minh ƀơi anih djă pioh gru grua lŏn ia yôm phăn Kim Liên ƀơi să Kim Liên, tơring glông Nam Đàn, tơring čar Nghệ An; nao tŭi ñang, dưm guang bơnga ƀơi pơsat tơhan djai pơsăn drơi jar kmar Việt Nam-Lao. Đĭ pơhiăp ƀơi tơring glông Anh Sơn, Khua git gai pơ ala mơnuih ƀôn sang dêh čar lăi pơtong, djru brơi sang anŏ tơhan rơka, tơhan djai pơsăn drơi, sang anŏ djru hơkrŭ lĕ bruă kiăng tŏ tui na nao, pơdah pran “mơñum ia hơdor kơ pô klơi”, “Gum djru, hơdor tơnga” mơng Ping gah, Kơnuk kơna hăng mơnuih ƀôn sang.

Lu hơdră djru hơmâo pok pơhai ba glăi tŭ yua anun lĕ: man pơdong sang dŏ, ngă gêh gal brơi hơdôm boh sang anŏ dưi čan prăk, khăm pơjrao brơi, ngă gêh gal brơi ană tơčô gơñu dưi hrăm hră. Hrŏm hăng tơlơi đing nao mơng Ping gah hăng kơnuk kơna, Khua git gai pơ ala mơnuih ƀôn sang dêh čar ăt brơi thâo, djop ƀon lan ăt kiăng jak iâu tơlơi gum pơgôp mơng mơnuih mơnam kiăng djru brơi hơdôm boh sang anŏ djru hơkrŭ, sit biă ñu kiăng lăng anai lĕ bruă mă tŏ tui na nao, sit biă ñu djru brơi hơdôm boh sang anŏ tơnap tap hloh.