Năng ai ñu 2h40’ čơtlăm lơ 12/7, mông ngă Lơphet čơkă Khua mir sir dêh čar ta ơi Tô Lâm dưi pơphun yôm phăn ƀơi Anih dô̆ mă bruă Ơi pơtao pơ̆ plơi prong jưh jom Phnom Penh gah yŭ tơlơi git gai mơ̆ng Ơi pơtao Norodom Sihamoni. Tơdơi kơ ngă Lơphet mơtăm Khua mir sir dêh čar ta ơi Tô Lâm bơkơtuai hăng Ơi pơtao dêh čar Kur Norodom Sihamoni.

Ăt amăng čơtlăm tom brơi (12/7) mơn, Khua mir sir dêh čar ta ơi Tô Lâm bơkơtuai hăng Khua git gai Ping gah mơnuih ƀôn sang dêh čar Kur, Khua git gai wai lăng pơ ala mơnuih ƀôn sang gơnong dlông dêh čar Kur Hun Sen. Dua gơñu pơsit yôm bôh than gum hrŏm mơ̆ dua bơnah hmâo amăng hơdôm hrơi rơgao. Pioh ngă kơjăp kơtang pơđĭ kyar hloh dong tơlơi rô nao rai amăng rơwang phrâo, dua bơnah pok pơhai klă lu tơlơi pơkôl gưl dlông, bôh tơhnal bruă bưp gưl dlông dua Ping gah, kơtưn hơdôm bruă pơbưp nao rai, bưp kơplah wah khua mua gưl dlông, hơdôm gưl hăng amăng hơdôm glông bruă, biă ñu kơplah wah khua git gai hlăk ai hăng hlăk ai dua bôh dêh čar, ăt kah hăng kơplah wah ƀing khua mua hlăk ai kual čơlah 3 pơđĭ kyar; ngă tui ba glăi bôh tơhnal hơdôm hơdră pơkă Jơnum min gum hrŏm Việt Nam - Kur gah bơwih ƀong, bôh thâo, kơsem min hăng hơdră mă yua măi mok, Jơnum gum hrŏm kơplah wah 3 Ding jum pơtom hiăp Việt Nam - Kur - Lao; pok prong bơkơtuai hăng gum hrŏm djru nao rai tơdruă kơplah wah hơdôm bôh ƀirô khua pơ ala mơnuih ƀôn sang, čih phiăn ngă tui tơlơi phiăn, hơdôm khul grŭp mơnuih ƀôn sang hăng hơdôm bôh tơring čar, ƀôn prong dua bôh dêh čar.

Mơmot tom brơi mơn, Ơi pơtao dêh čar Kur Norodom Sihamoni git gai pơphun pơpŭ asơi yôm phăn kơ Khua mir sir dêh čar ta ơi Tô Lâm hăng Grŭp khua pơ ala gưl dlông Kơnuk kơna dêh čar Việt Nam./.