Khua mir sir dêh čar ta ơi Tô Lâm nao pơhmư̆ hăng pơhiăp črâo ba mông ngă lơphet. Pơhiăp amăng mông ngă lơphet, pơ ala kơ khua git gai Ping gah, Kơnuk kơna, Khua mir sir dêh čar ta ơi Tô Lâm hur har pran jua bơni lu bôh than, tơlơi gir run, tơlơi gơgrong hlâo, klă mơ̆ng Ping gah ƀôn prong, Gong gai, khul Kông ang hăng hơdôm ƀirô, grŭp, gơnong bruă, khul grŭp ƀôn prong Hồ Chí Minh amăng pơphun ngă tui tơlơi phiăn hăng prăp lui klă kơ bruă pơdŏng khul gum hrŏm pơgang rơnuk rơnua, hơđong plơi pla; hơ-ưč hmưi khul gum hrŏm pơgang rơnuk rơnua, hơđong ƀơi plơi pla ƀôn prong Hồ Chí Minh hăng amăng đơ đam dêh čar hmâo sit nik pơjing hăng mă bruă mơ̆ng ră anai.

Khua mir sir dêh čar ta đăo kơnang, hăng phiăn juăt ư-ang hăng ba glăi bôh tơhnal, bôh than dưi ngă amăng hơdôm hrơi rơgao, thun 2024 hăng hơdôm thun tô̆ tui, gưl ping gah, gong gai hăng mơnuih ƀôn sang ƀôn prong Hồ Chí Minh amra ngă truh kih hơdôm tơhnal ba tơbiă. Khul gum hrŏm pơgang rơnuk rơnua, hơđong plơi pla amra ngă tui klă bruă djru khul Kông ang hăng hơdôm khul apăn bruă wai lăng kơjăp bruă rơnuk rơnua hơđong, djru pơdŏng, pơđĭ kyar ƀôn prong jai hrơi jai pơhlôm, pơdrŏng asah klă hiam, thâo rơgơi, tŭ yua biă kơ tơlơi hơđong, yâo mơ-ak mơ̆ng mơnuih ƀôn sang./.