Mơguah lơ 16/5, ƀơi sang bruă ping gah dêh čar, gah yŭ kơ tơlơi git gai mơ̆ng ơi Nguyễn Phú Trọng, Khul khua mua apăn bruă ping gah dêh čar tal XIII pơphun jơnum lok 9. Ƀơi mông jơnum anai, khua mua apăn bruă ping gah dêh čar pơčrong sai bruă mă kah hăng: Akŏ bruă čih hră lăi pơthâo jơnum ruah khua ping gah dêh čar tal XIV; prăp lui bruă mă git gai pơphun jơnum ruah khua ping gah djop gưl, anăp nao jơnum prong ruah khua ping gah dêh čar tal XIV hăng hơdôm bruă mă yôm pơkŏn.

Pơhiăp amăng mông jơnum, ơi Nguyễn Phú Trọng Khua git gai ping gah dêh čar lăi rơđah: Tui hăng akŏ bruă, Jơnum ruah khua ping gah dêh čar tal XIV, amra pơphun amăng akŏ thun 2026, tơdơi kơ krep rơwang bruă 5 thun gưl ping gah, mơnuih ƀôn sang, ling tơhan gir run ngă tui Hră pơtrun jơnum ping gah tal XIII. Boh yôm phun mă bruă jơnum gơnong dlông tal anai yôm biă mă, ơi Nguyễn Phú Trọng Khua git gai ping gah ta pơtrun hiăp, gơnong dlông hăng ƀing pơ ala nao jơnum ăt pơdah thâo tơlơi pơmin, ia rơgơi, pran jua mă bruă khut khăt tơpă hnong, kơsem min tong ten, pơčrong sai tum teč, pơgôp hiăp pioh ngă pơgiong hĭ djop pok hră lăi pơthâo, kơčăo bruă sem lăng, pơsit tal rơnuč mông jơnum.