Kơ-iăng khua dêh čar ơi Trần Hồng Hà pơsit tong, Kơnuk kơna hăng mơnuih ƀôn sang Việt Nam lăng yôm tơlơi gơgrong mơng WHO amăng bruă git gai gum hrŏm, pơlir tar ƀar rŏng lŏn tơnah amăng bruă ia jrao, bơwih brơi tơlơi suaih pral kơ mơnuih ƀôn sang. Amăng djop mơta bruă, hơdră bruă gah ia jrao, bơwih brơi tơlơi suaih pral ƀơi dêh čar Việt Nam lêng hơmâo tơlơi gum hrŏm, črâo ba mơng ƀing apăn bruă, mơnuih rơgơi kơhnâo mơng WHO.

Sit biă ñua, amăng thun blan klin Covid-19 hơđuh đĭ, Dêh čar Việt Nam hơmâo tơlơi gum djru tañ hloh, hmao tlôn, tŭ yua mơng WHO kiăng găn rơgao hăng dưi pơgang hĭ klin kheng. Jing sa amăng 15 boh dêh čar hơmâo WHO ruah jao brơi boh thâo pơkra vaccine mNRA, Việt Nam čang rơmang hơmâo tơlơi gum djru sit nik dong kiăng hrưn đĭ amăng kơsem min, pơkra pơjing vaiccine, ƀu djơ̆ kơnog pơgang klin kman phrâo đôč ôh mơ̆ ăt wŏt hơdôm tơlơi duam ruă glăk ƀuh mơnuih ruă lu tui ruă kơsô̆…