Ƀơi mông bưp, Kơ-iăng khua dêh čar ơi Trần Lưu Quang bơni hơ-ơč kơ hơdôm tơlơi hơmâo ngă mơng Ping gah Mơnuih ƀon sang hơkrŭ dêh čar Lao hăng mơnuih ƀon sang djŏp djuai ania Lao amăng hrơi pơđĭ kyar bơwih ƀong huă - mơnuih mơnam, lăi pơtŏng, tơlơi rô nao rai dua Ping gah, Kơnuk kơna hăng mơnuih ƀon sang dua bơnah glăk klă hiam. Kơ-iăng khua dêh čar đăo gơnang, tal rai čuă mơng Khul khua amra ngă dlăm tui tơlơi rô nao rai klă hiam prong prin, thâo gum pơgôp yôm phăn, ngă hrŏm amăng abih bang bruă kơplah wah Việt Nam - Lao.

Kơ-iăng khua dêh čar kiăng amăng hrơi blan pơ anăp, dua ding jum kiăng ngă hrŏm kơjăp hloh amăng bruă kĭ pơkôl ngă hrŏm; pok pơhai hơdôm bruă dưi ngă kah hăng: Kơsem min čih pơkra tơlơi phiăn, wai lăng Kơnuk kơna; pơbưp nao rai dua Ding jum, pơtô bruă brơi ƀing khua; lăi pơthâo bruă čih pơkra tơlơi phiăn bơdjơ̆ nao gong gai plơi pla.