Kông điêng hơmâo mơ-it nao Jơnum min mơnuih ƀôn sang tơring čar Quảng Ninh; Khul git gai dêh čar kơ bruă pơgang tơlơi truh sat hăng hơdôm ding jum, gơnong bruă bơdjơ̆ nao. Tui lăi pơthâo tañ mơng anom bruă khul git gai bruă pơgang tơlơi truh sat, djru ană mơnuih hăng wai pơgang mơnuih mơnam tơring čar Quảng Ninh, mơguah lơ 25/4, amăng ia krông Chanh ƀơi să Quảng Yên, tơring čar Quảng Ninh ƀuh ƀattô trăm, ngă 4 čô mơnuih rơngiă (2 čô dưi luai nao pơ hang).

Khua dêh čar hơmâo mơ-it nao tơlơi tơña bla hơdôm sang anŏ hơmâo mơnuih rơngiă, rơkâo Khua Jơnum min mơnuih ƀôn sang tơring čar Quảng Ninh hăng hơdôm anom bruă bơdjơ̆ nao tŏ tui git gai, pok pơhai bruă pơsir hĭ tơlơi truh sat, đing nao hơdôm bruă jao anun lĕ: Tŏ tui pơkiăo nao tơhan, gơnam măi mok kiăng mă yua amăng ĕp mơnuih glăk rơngiă hăng pran jua ječ ameč, tañ hloh. Khua Jơnum min mơnuih ƀôn sang tơring čar Quảng Ninh git gai hơdôm anom bruă bơdjơ̆ nao tañ pơsit tong, pel ĕp tong ten anŏ ba truh, ngă rơđah tơlơi glăm ba kiăng hmao tlôn lăng glăi hăng pơsir hĭ hơdôm tơlơi soh glăi (tơdah hơmâo) djơ̆ tơlơi pơkă amăng tơlơi phiăn.