Ơi Nguyễn Thiện ƀơi grup 7 phường Yên Thịnh, plơi prong Yên Bái thun anai 90 thun laih, samơ̆ ăt hơdor na nao thun blan nao ngă tơhan ƀô̆ đô̆i pơtruh tơlơi pơhing, blan 3/1950, lơ̆m anun ñu glăk 16 thun đôč. Ơi Thiện brơi thâo, tơlơi ñu lăp hơdor hloh amăng rơnuk blah ƀơi Điện Biên Phủ lĕ hrŏm hăng ƀing gŏp tơhan hmư̆ ayong Văn (anun lĕ Đại tướng Võ Nguyên Giáp) ră ruai, pơtă pơtăn kơ bruă pơhlôm pơtruh nao rai, lăi pơhmư̆ bơwih brơi bruă blah ngă, sa bruă yôm biă mă:“Abih bang mơnuih amăng puih kơđông hơmâo jak nao pơ kơnua čư̆  hông, hmư̆ ayong Văn ră ruai. Ayong Văn lăi pơthâo dua tal blah phrâo rơgao, ră anai prăp lui kơ tal 3. Lăi nao bruă tui anun, ñu lăi kơnong bruă pơtruh nao rai tơlơi pơhing khŏm ngă na nao, ƀu dưi tơ̆i đưn ôh”.

Amăng tơlơi hơdor mơ̆ng ơi Thiện, tlam lơ 7/5 jing hrơi blan yôm pơphăn biă mă, hmư̆ hing ƀing Prang yor tơngan ƀu dưi blah dong tah, ling tơhan hlơi hlơi lêng kơ hok mơ-ak soh:“Mơ̆ng ngŏ iâu telephôn kơ hơdôm anom bruă; ayong khua git gai ƀing gơmơi lăi pơthâo brơi hơdôm gong phun pôr pơhing, lơ̆m anun hok mơ-ak kơtang kơtit”.

Ơi Phan Như Lục, tơkeng thun 1931, ăt ƀơi phường Yên Thịnh, plơi prong Yên Bái hlâo adih ñu ngă tơhan pơnah phao ră ruai: hơdôm hrơi blah ngă glêh glar ƀơi Điện Biên Phủ hơdui phao đĭ trun, klơi luh pit đih...samơ̆ pran jua ling tơhan kjăp biă mă, blah pơgăn ayăt ƀu thâo ba nao gơnam yua, anun jing gơñu ƀu dưi blah dong tah:“Yua hơmâo pơtô pơblang, tơlơi pơmin mơ̆ng adơi ayong ngă tơhan lơ̆m anun ƀing khua lăi hiư̆m pă lĕ hla tui mơtăm yơh; kơnang kơ Đại tướng; tơlơi git gai hiư̆m pă lêng kơ ngă tui soh. Ƀing ayăt ƀu thâo hlâo, hơmâo tơhan pơnah phao ƀing ta pơgăn jơlan ƀing gơñu, jing jơlan rơdêh por gơñu ƀu thâo nao dong tah”.

Tơlơi hơdor glăi kơ rơnuk blah dưi ƀơi Điện Biên Phủ ăt hơmâo djă pioh amăng hơdôm mơta gơnam yơyôm, hơmâo anom apăn bruă tơring čar Yên Bái djă lui, pơdă pơ lan sang Gru gru đưm, pơƀuh glăi rơnuk hing ang mơ̆ng mơnuih ƀôn sang djŏp djuai ania tơring čar Yên Bái gum hrŏm hăng dêh čar blah dưi ƀơi Điện Biên Phủ. Ơi Lý Kim Khoa, Kơ-iăng khua Sang djă pioh gru đưm tơring čar Yên bái brơi thâo, hơdôm mơta gơnam hơmâo hyu ĕp lu biă, mơ̆ng phao kơtuang, ao pơgang boh phao, kơsăk pioh braih truh kơ hla kơ bơkơtưn ngă bruă mơ̆ng tơhan hăng mơnuih ƀôn sang tơring čar Yên Bái amăng rơnuk 1952-1954...Amăng anun hơmâo hơdôm gơnam yôm kah hăng hla kơ đơ anet arăng iâu đuôi nheo hơmâo sit hrĕ mrai thun 1953 mơ̆ng Anom bruă git gai sang măi jơlan 13 brơi kơ hlăk ai bơwih brơi ƀơi čư̆ čun čoe Lũng Lô:“Hla kơ đuôi nheo lơ̆m anun mă yua či pơčrâo jơlan brơi hơdôm boh rơdêh pơgiăng phao kơtuang, ia jrao tui jơlan čư̆ čun čoe Lũng Lô, nao pơ Cò Nòi hăng nao pơ Điện Biên Phủ. Hơdôm mơta gơnam pơ anai yôm biă mă yua ñu nao hrŏm hăng ƀing tơhan”.

Lăng glăi 70 thun pơ tlôn adih, ƀơi anăp tơlơi pơmin soh sat mơ̆ng ayăt Prang, Ding jum kơđi čar, Khul khua apăn bruă Ping gah jơnum pơčrông sai hăng ba tơbiă Tơlơi pơtrun hluai tui bruă blah ngă bơyan Puih - Phang thun 1953-1954. Tơring čar Yên Bái hrơi mông anun hơmâo Ping gah hăng Kơnuk kơna jao pok jơlan 13 mơ̆ng tơdrun ia Phà Hiên (Tuyên Quang) nao pơ Ba Khe đĭ nao hăng jơlan čư̆ Lũng Lô. Hăng pran jua hur har, khut khăt djru blah ngă, Ping gah tơring čar Yên Bái gir pơčrông sai bruă blah ngă prăp lui kơ hrơi blah ngă bơyan Puih Phang.

Gơnam dŏ glăi ră anai lĕ hră pơčrâo trun mrô 15 mơ̆ng Khul apăn bruă Ping gah tơring čar Yên Bái kơ bruă pơhrŏ prăk jia thun 1953; Tơlơi pơtrun mơ̆ng Khul khua apăn bruă Ping gah tơring čar Yên Bái lơ 2/5/1953 kơ akŏ pơdong Khul khua wai lăng Anom bruă pơkra jơlan mrô 13...Yă Hoàng Thị Thanh Thủy, Khua anom bruă Djă pioh gơnam gru đưm tơring čar Yên Bái lăi:“Hră pơ-ar hơmâo lu hră yơyôm lăi nao bruă ngă truh kih mơ̆ng tơhan hăng mơnuih ƀôn sang tơring čar Yên Bái djru blah dưi ƀơi Điện Biên Phủ. Amăng anun, hơmâo Tơlơi pơtrun mơ̆ng Ping gah tơring čar hăng hơdôm hră pơ-ar mơ̆ng Jơnum min wai lăng blah ngă tơring čar Yên Bái lăi pơthâo kơ Kơnuk kơna pơčruh prăk blơi braih huă añăm ƀong bơwih brơi kơ bruă blah ngă”.

Abih bang hơdôm gơnam yơyôm hơmâo Sang djă pioh gru đưm tơring čar Yên Bái ngă hrŏm hăng Anom bruă djă pioh gru đưm tơring čar Yên Bái pơphun pơdă prưng ƀơi lan sang Djă pioh gru đưm tơring čar Yên Bái ƀrô ngă lơphet 70 thun blah dưi ƀơi Điện Biên Phủ kiăng mơnuih ƀôn sang hăng ƀing tuai thâo hluh rơđah hloh kơ hơdôm tơlơi gum pơgôp mơ̆ng tơhan hăng mơnuih ƀôn sang tơring čar Yên Bái amăng rơnuk blah dưi ƀơi Điện Biên Phủ./.