Ƀơi mông jơnum, tui hăng Khua dêh čar, Bruă pơkă hnong tơring čar Tây Ninh mơ̆ng thun 2021-2030, lăng nao pơ anăp adih truh thun 2050 hơmâo pơdah thâo tơlơi pơmin, anŏ kiăng, bruă lăng nao pơ anăp, tơhnal pơkă phun, pơblih hmar pơđĭ kyar; hơdră či pơđĭ kyar, hơdră či pơsir, mơnuih mă bruă, prăk kăk tuh pơ alin ngă tui bruă pơkă hnong tơring čar Tây Ninh hơmâo lăi pơthâo pơđĭ kyar kiăng mơtah mơda, pơđĭ kyar hmar, hlom bom, hơđong kjăp; pok jơlan anăp ngă bruă, lăng nao pơ anăp anih pơđĭ kyar phrâo, pơjing pran kơtang, rơnoh yôm phrâo brơi kơ Tây Ninh kiăng pơƀuh rup rap hiam klă brơi hơdôm tơring čar, ƀôn prong amăng kual hăng amăng dêh čar hla tui.

Khua dêh čar ơi Phạm Minh Chính pơtrun hiăp kơ tơring čar Tây Ninh pok pơhai pơphun ngă tui akŏ bruă kiăng djơ̆ sa hnong, gêh găl hăng hnong pơkă hrŏm abih bang amăng dêh čar, amăng kual, akŏ bruă mơ̆ng djop anom bruă, črăn ngă tui, kiăng tañ čih pơkra dăp hơdră, ngă hră pơar, pok pơhai ba glăi boh tŭ yua djơ̆ hăng akŏ bruă či pơkă hnong anun.