Lơ 25/4, tơring čar Bình Dương jơnum pôr pơthâo Hră pơtrun mơ̆ng Jơnum min apăn bruă phun pơ ala mơnuih ƀôn sang dêh čar kơ bruă akŏ pơdong phường An Điền, An Tây gah plơi prong anet hơđăp Bến Cát laih anun pơđĭ jing plơi prong Bến Cát. Nao jơnum hrŏm hơmâo Kơ-iăng Khua pơ ala mơnuih ƀôn sang dêh čar ơi Trần Quang Phương. Phường An Điền, An Tây lĕ dưi akŏ pơdong kah pơpha đơ đam lŏn mơ̆ng dua boh să ăt djă anăn hnun mơ̆n. Plơi prong Bến Cát tơdơi kơ dưi akŏ pơdong hơmâo 7 boh phường hăng 1 boh să.

Thun blan rơgao, Bến Cát pơtrut bruă man pơdong anih tuh tia pơkra ming sa ƀut, truh ră anai, amăng plơi prong hơmâo 8 ƀut ngă anih tuh tia pơkra ming, 1 boh ƀut pơkra ming prong pơtum truh 180.000 čô mơnuih mă bruă aoah. Hơdôm ƀut tuh tia pơkra ming anun hơmâo pơhưč 6.441 kơčăo bruă nao tuh pơ alin, amăng anun rơnoh prăk tuh pơ alin mơ̆ng dêh čar tač rơngiao lĕ 816 kơčăo bruă hăng rơnoh prăk 9,8 klai USD. Pơhiăp đĭ amăng mông jơnum, Kơ-iăng khua pơ ala mơnuih ƀôn sang dêh čar ơi Trần Quang Phương brơi thâo, bruă akŏ pơdong plơi prong Bến Cát lĕ sa bruă mă yôm, djă pioh yak pơđĭ kyar phrâo mơ̆ng tơring čar anai. Kơ-iăng khua pơ ala mơnuih ƀôn sang dêh čar ơi Trần Quang Phương rơkâo khua mua plơi prong Bến Cát ăt gir run hloh, hneč mă anŏ gêh găl hăng tơlơi kơtang mơ̆ng plơi prong pioh pơtrut pơđĭ kyar bơwih ƀong huă mơnuih mơnam tŭ yua hloh.

Tui anun, yap truh ră anai, Bình Dương hơmâo 5 boh plơi prong: Bến Cát, Tân Uyên, Thuận An, Dĩ An, Thủ Dầu Một. Anai lĕ tơring čar hơmâo lu plơi prong gah tơring čar wai lăng hloh amăng dêh čar.