Hơjan hlâo blung a amăng tlam mơmot lơ 3/5 či tơring čar Kon Tum ăt djru hơdôm anom bruă wai lăng glai rưng plai ƀiă laih bơngơ̆t lơ̆m hơdôm rơtuh ektar glai rưng ƀơi tơring glông Sa Thầy, Ia H’Drai, Đăk Tô, Ngọc Hồi, Kon Braih, Đăk Glei, plơi prong Kon Tum glăk pơhŭi hơmâo apui ƀong kơtang. Ơi Nguyễn Văn Huy, Khua anom bruă pơkă hlâo ayuh hyiăng tơring čar Kon Tum brơi thâo: anai jing hơjan hlâo. Ia hơjan ƀơi hơdôm boh tơring kah hăng Đăk Hà, Sa Thầy, Đăk Tô, Kon Plong hăng Đăk Glei hơmâo mơ̆ng 50-70mm. Hơdôm boh tơring dŏ glăi ăt hơmâo mrô ia hơjan mơ̆ng 20-40mm. Hăng mrô ia hơjan tui anun, phun pla ƀơi tơring čar hơmâo djŏp ia pruih laih amăng 5-7 hrơi.

Tlam lơ 3/5, ƀơi plơi prong Plei Ku, Gia Lai hăng hơdôm tơring glông ieo gah hơmâo hơjan laih, na nao amăng 1 mông. Anai arăng lăi kah hăng ia hơjan mah yua ngă rơ-ơ̆ ƀiă laih kơ phun pla hmua pơdai amăng tơring čar. Hơjan prong amăng akŏ bơyan ƀơi Plei Ku hăng hơdôm tơring glông Čư̆ Pah, Ia Grai hăng Đak Đoa, truh pơ Čư̆ Prong, tơring čar Gia Lai sui rơbêh 1 mông. Hơjan prong djru ngă plai ƀiă pơ-iă hang, dol pran jua laih anun djru kơ phun pla plai ƀiă kơƀah ia sui hrơi tơl krô hla.

Tui hăng anom bruă sem lăng hlâo hlim hơjan kual Dap Kơdư, amăng hơdôm hrơi pơ anăp, ƀơi Gia Lai ăt amra hơmâo hơjan đôč pơ lu anih. Tơlơi anai sit mơ̆n či ngă rơ-ơ̆ ƀiă yơh. Mah hnun, yua adai pơ-iă hang kơtang sui hrơi, anun amra hơmâo hơjan tơlô̆ pler, hơkruah yâo, ngă răm phun pla hmua pơdai. Yua kơ anun, mơnuih ƀôn sang ngă hmua kơđiăng bong glăi hăng hơmâo hơdră pơsir djơ̆ lăp.