Kông ty sa ding kơna kơphê 15, gah anom bruă khua tơhan kual 5 (QK5), ră anai hlăk pla pơjing wai lăng 820 ha đang kơphê hăng 130 ha đang kơsu. Rơnoh prăk pơhrui glăi rim thun 150 klai prăk, tơlơi hơdip mơda mơnuih ƀôn sang ngă bruă kơ kông ty anai dưi pơblih pơđĭ kyar na nao, sa blan ƀong prăk apah mă bruă rơbêh 9 klăk sa čô.

Hrŏm hăng bruă bơwih ƀong huă, kông ty dŏ djru hrŏm amăng bruă pơtô hrăm blah ngă, pơtrut pran jua prăp na nao blah ngă; djru kơ bruă pơhlôm, pơgang tơlơi truh lŏn adai ngă, hơduah ĕp mơnuih amăng mông ječ ameč; pơhlôm,pơgang klin kheng duăm ruă; gum tơngan hrŏm man pơdong plơi pla phrâo, ngă tui hơdră lui rơmŏn kŏn rin kơjăp hơđong. Ƀơi mông mă bruă, Kơ-iăng khua git gai pơ ala mơnuih ƀôn sang dêh čar, ơi Trần Quang Phương git gai kông ty ăt pơtong rơđah tong ten anăp pơđĭ kyar amăng rơnuk phrâo; ngă klă hloh bruă akŏ pơdong ping gah, man pơdong anom bruă kơjăp kơtang hlom bom “ba gru hlâo bruă mă”; ngă klă bruă pơtô mơnuih ƀôn sang, jĕ giăm ană plơi pla, djru pran jua man pơdong plơi pla anih dŏ mă bruă hơđong amăng kual Tong krah-kual Dap Kơdư dêh čar.