Thun anai tơring čar Kon Tum hmâo 5.300 čô čơđai rơkâo pơplông mă ƀăng gưl 3. Kiăng pơđĭ bôh tơhnal bruă pơhrăm lui hlâo, rơbêh kơ 220 čô nai pơtô čơđai hmâo gum hrŏm djru čơđai pơhrăm. Hluai tui bôh tơhnal pơplông lông lăng hăng pơhrăm lui hlâo mơ̆ng blan 3 truh ră anai, čơđai sang hră dưi pơpha jing 3 ƀut: bôh thâo ƀu lu, găp ƀrô hăng thâo – rơgơi.

Bruă pơhrăm brơi hlâo dưi pơphun lăp djơ̆ hăng rim ƀut čơđai kiăng ƀing čơđai thâo, pơhrăm ngă tơlơi pơplông. Gơnong bruă pơtô pơhrăm tơring čar Kon Tum hmâo pơjing laih grŭp pel ĕp nao pơ̆ hơdôm bôh sang hră pioh lăi pơthâo, gum djru, hrŏm hăng anun rơkâo Grŭp apăn bruă sang bruă wai lăng rơnoh pơhrăm lui hlâo rim mông, rim rơwang hrơi tơjuh. Hơdôm bôh sang hră ăt lăng tui kơjăp mơn tơlơi pơplih mơ̆ng ƀing čơđai hăng pơsit tal pơplông kơjăp pơhrăm rim mơta tơlơi hrăm. Anai lĕ tơlơi gir run sit nik pioh pơđĭ dlông mrô čơđai đĭ anih hăng puang amăng tal pơplông mă ƀăng gưl 3 pơ̆ anăp anai./.