Tui lăi pơthâo, rơwang tal I/2026, Phú Quý tŏ tui pơđĭ kyar kơtang, anih čuă ngui dưi čơkă giăm 42 rơbâo wŏt tuai, sĭ mơdrô - bơwih bơwang dik dak, mă akan hơdang truh 3.570 tơ̆n, pơhmu tui tơđar. Pơplih ngă hră pơ-ar, pơplih mrô, wai pơgang rơnuk rơnua hơmâo pơhlôm hơđong kjăp. Samơ̆, anih anom ter hang ia rơsĭ, ia yua, pơsir hĭ bruă asuk ruk hăng wai lăng lŏn mơnai, bơwih brơi tuai čuă ngui ăt dŏ lu tơlơi gun.

Đĭ pơhiăp amăng mông jơnum, Khua Jơnum min mơnuih ƀôn sang tơring čar Lâm Đồng ơi Hồ Văn Mười lăi pơtong, hăng kual bul pơtâo Phú Quý, kiăng pơsir hĭ khut khăt tơlơi gun kơ jơlan nao rai, tơdrun kompăn, apui yua, ia yua hăng anih dŏ jum dar; đing nao pơđĭ kyar bruă mă akan hơdang, tuai čuă ngui, jak iâu tuh pơ alin dưm dăp, ĕp lăng bruă man pơkra anih anom ter hang ia rơsĭ, tơdron rơdêh por, tơdrun kompăn mơng rơwang pơ anăp mơtăm.