Mơguah lơ 16/5, ƀơi Quảng Bình, Khul hlăk ai mut phung rơnuk Hồ Chí Minh hăng Khul hlăk ai hơđăp kơsung ngă bruă Việt Nam pơphun pơdă prưng rup, hơdrôm hră hơmâo anăn “Pơ-ư pơ-ang Trường Sơn”. Nao pơhmư̆ hơmâo lu tơhan hơđăp, hlăk ai kơsung ngă bruă, khua mua hlăk ai hơdôm boh tơring čar Nghệ An, Hà Tĩnh, Quảng Bình, Quảng Trị, Thừa Thiên Huế, Quảng Nam, Dak Lak, Gia Lai, Kon Tum, Dak Nông hăng Bình Phước. pơdă prưng hơmâo 300 pok rup, hră pơ-ar yơyôm pơƀuh glăi rơnuk blah wang tuh drah pơčah asar ƀơi jơlan Trường Sơn; pơƀuh bruă ngă mơ̆ng hlăk ai amăng rơnuk pơplih phrâo

Ƀơi Gia Lai, mơguah tom brơi, lơ 16/5, Khul gru grua tơhan Trường Sơn plơi prong Plei Ku, tơring čar Gia Lai jơnum hơdor glăi tal 65 thun Hrơi gru grua tơhan Trường Sơn. Ƀơi mông bưp abih bang hơdor glăi bruă mă gru grua hing ang khin hơtai găn rơgao tơlơi tơnap tap mơ̆ng tơhan ƀô̆ đô̆i Trường Sơn. Jơlan Trường Sơn-jơlan HCM hơmâo anŏ yôm phara biă mă amăng tal djru pơgiăng gơnam hăng tơhan mơ̆ng kual gah kơdư trun nao pơ dơnung blah ayăt Mi sua lŏn ia, pơklaih rơngai djuai ania ƀơi Dơnung, hlong pơlir lŏn ia jing sa.

Ră anai, jơlan HCM lĕ sa amăng hơdôm arăt jơlan phun găn rơgao nao ƀơi 28 boh tơring čar, ƀôn prong, amăng anun hơmâo plơi prong Plei Ku, tơring čar Gia Lai, djru hrŏm prong biă mă pơtrut bơwih ƀong huă mơnuih mơnam tơring čar. Khul tơhan hơđăp Trường Sơn plơi prong Plei Ku hơmâo 87 čô ding kơna, lu biă mă ƀing tơhan rơka rơkač, mơnuih djơ̆ jrao hret. Mah lu amăng anun tha rơma laih soh samơ̆ tơhan rơnuk Wa Hồ ăt hur har mă bruă pơđĭ kyar bơwih ƀong huă kơ sang anŏ.