Amăng tal nao mă bruă ƀơi tơring čar Sơn La amăng lơ 8/1/2024, Khua git gai Ping gah Nguyễn Phú Trọng hăng grŭp hyu mă bruă hmâo nao čuă hăng mă bruă ƀơi Sang măi pơkĕ apui lơtrik dar hăng jua ia Sơn La. Hăng mơnuih apăn bruă, mơnuih mă bruă – pô hmâo ư-ang dưi čơkă Khua git gai Ping gah dêh čar anun lĕ hơdôm anô̆ djă pioh, pơđom pioh ƀu thâo wor bit. Pran jua, tơlơi pơhiăp mơ-ak hăng hơdôm tơlơi pơtă dơlăm mơ̆ng Khua git gai Ping gah dêh čar dưi hmâo rim mơnuih djă pioh hăng hrăm tui. Khua git gai Ping gah dêh čar čang rơmang grŭp mơnuih apăn bruă, kỹ sư, mơnuih juăt bruă, mơnuih mă bruă gah Sang bruă ngă tui dong tơlơi găn rơgao, bôh than dưi ngă amăng pơdŏng, mă yua ring bruă, pơtŏng sit dong pran đăo kơnang, bruă mă yôm phăn mơ̆ng drai pơkĕ apui lơptrik Sơn La; djru pơdŏng, mă yua pơhlôm, ba glăi bôh tơhnal hơdôm ring bruă drai ia pơkĕ apui lơtrik pơkon mơ̆ng lŏn ia.

Hmư̆ hing Khua git gai Ping gah dêh čar ơi Nguyễn Phú Trọng rơngia, ƀing apăn bruă hăng mơnuih ƀôn sang tơring čar Quảng Ngãi hning rơngŏt biă mă. Khua git gai Ping gah dêh čar ơi Nguyễn Phú Trọng lĕ mơnuih ba gru hiam tui kơnuih ngă hơkrŭ; abih pran jua hăng bruă mă mơng Ping gah, brơi lŏn ia hăng mơnuih ƀôn sang.  Tui hăng ƀing apăn bruă hăng mơnuih ƀôn sang tơring čar Quảng Ngãi, Khua git gai Ping gah dêh čar ơi Nguyễn Phú Trọng lĕ khhua mua pơprong hơdip jê̆ giăm hăng kiăng khăp ƀu-eng. Ơi Phạm Đình Khối, Khua git gai Ping gah tơring čar Quảng Ngãi hơđăp brơi thâo: Hơmâo bưp Khua git gai Ping gah dêh čar ơi Nguyễn Phú Trọng lu wŏt samơ̆ mông kơđŏm glăi tơlơi yôm hloh lĕ lơm wa Trọng glăk pơ Quảng Ngãi nao ngă lơphet pok anih djă pioh gru grua Khua dêh čar Phạm Văn Đồng. Lơ 31/8/2008, Khua git gai Ping gah dêh čar ơi Nguyễn Phú Trọng ruah đĭ rơdêh treng mơng Hà Nội nao pơ Quảng Ngãi. Čơkă Khua git gai Ping gah ƀơi Quảng Ngãi, ơi Phạm Đình Khối hăng lu mơnuih ol kơdol pran jua biă mă:

“Sa čô khua mua pơprong tui anun mơ̆ đĭ rơdêh treng mơng Hà Nội rai pơ anai. Lơm ƀơk bơnga brơi Khua git gai Ping gah hăng mă tơngan, kuar Khua git gai Ping gah kâo mưn jê̆ giăm biă mă, kar hăng pran khăp pap tơdruă mơn. Nao čuă 3 hrơi samơ̆ wa weh hyu lu anih. Tơdơi anun ñu nao pơ Tây Trà, nao čuă hơdôm boh să, tơña blan neh met wa, ƀơk gơnam brơi mơnuih ƀôn sang, samơ̆ hăng Khua git gai Ping gah, anai lĕ pran khăp prong biă mă”.

 Hrŏm hăng đơ đam dêh čar, mơnuih ƀôn sang tơring glông Mỹ Xuyên, tơring čar Sóc Trăng ruă pran jua biă lơm hmư̆ hing Khua git gai Ping gah Nguyễn Phú Trọng rơngiă. Pơplih ruă pran jua jing bruă ngă hơkrŭ, Ping gah, gong gai hăng mơnuih ƀôn sang tơring glông Mỹ Xuyên gum hrŏm hơbit dong, hur har, pơčeh phrâo, pơsit run pran pơdŏng Ping gah, pơdŏng glông bruă kơđi čar klă hiam, kơjăp kơtang, pơdŏng plơi pla jai hrơi jai pơđĭ kyar, yâo mơ-ak kah hăng Khua git gai Ping gah hmâo čang rơmang. Ơi Lương Minh Quyết, Khua hơđăp Khua Jơnum min mơnuih ƀôn sang tơring glông Mỹ Xuyên, ruai glăi, rơgao hăng anai giăm truh 10 thun, Khua git gai Ping gah Nguyễn Phú Trọng nao čuă mă bruă hăng să Ngọc Tố ( 1 amăng 3 bôh să plơi pla phrâo blung a mơ̆ng tơring čar Sóc Trăng), lơm dưi bưp Khua git gai Ping gah pioh glăi amăng ñu gru rŭp mơ̆ng Khua git gai Ping gah tâ̆o klă, hmâo pran gơgrong kơjăp hăng dơlăm. Ơi Lương Minh Quyết ruai glăi:

“Ră anai Wa đuăi lui laih, pioh glăi amăng kâo ăt kah hăng djop mơnuih sa tơlơi hning rơngôt prong biă. Amăng tơlơi hning rơngôt anun, kâo čang rơmang ƀing ta pơplih tơlơi hning rơngôt jing bruă ngă hơkrŭ; rim mơnuih apăn bruă, mơnuih ping gah hăng mơnuih ƀôn sang gir run hrăm tui gru wa Khua git gai Ping gah Nguyễn Phú Trọng pioh djru pơdŏng plơi pla ta, lŏn ia ta jai hrơi pơđĭ kyar pơdrŏng asah klă hiam, thâo rơgơi hăng kơjăp kơtang”.