Lơ 14/7/2024, Khua git gai Ping gah dêh čar ơi Nguyễn Phú Trọng hơmâo nao čuă să Bản Bo, tơring glông Tam Đường, tơring čar Lai Châu. Hơdôm boh pơhiăp, tơlơi juh alum mơng Khua git gai Ping gah dêh čar jing tơlơi pơtrut pơsur kiăng mơnuih ƀôn sang, gong gai să Bản Bo hrưn đĭ pơklaih mơng ƀun rin. Hluh rơđah tơlơi jum alum, tơlơi črâo ba mơng Khua git gai Ping gah dêh čar, gong gai hăng mơnuih ƀôn sang djop djuai ania să Bản Bo gir run, găn rơgao tơnap tap, truh ră anai să Bản Bo jing kual pla če prong hloh amăng tơring glông Tam Đường, tơlơi hơdip kơ mơnuih ƀôn sang jai hrơi jơnap tui. Ping gah, gong gai hăng mơnuih ƀôn sang djop djuai ania să Bản Bo lêng kơ hơdor tơngia hơdôm tơlơi pơtă mơng Khua git gai Ping gah; anai lĕ đing nao pơđĭ kyar bơwih ƀong huă hăng bruă ngă hmua, man pơdong plơi pla phrâo, tŭ mă hơdôm tơlơi gal kiăng pơđĭ kyar pla phun boh troh, rông hlô mơnong, pla phun če hiam hơdjă pơlir hăng hơdôm anom bơwih ƀong sĭ mơdrô kiăng pơhlôm hơđong sĭ gơnam hăng ƀơƀrư̆ hơdai nao pơđĭ kyar bruă bơwih brơi tuai čuă ngui.

Ƀơi kual giăm guai dêh tơring glông Tuy Đức, tơring čar Dak Nông, hmư̆ hing Khua git gai ping gah ơi Nguyễn Phú Trọng rơngiă, ƀing khua mua, mơnuih ping gah hăng mơnuih ƀôn sang djop djuai ania hning tui biă mă kơ mơnuih ngă khua abih tơlơi hơdip yua kơ dêh čar, yua kơ ană plơi pla. Ơi Điểu Khanh, djuai ania Mnông, Kơ-iăng Khua Jơnum min mơnuih ƀôn sang să Quảng Trực lăi:

“Mơ̆ng kual guai dêh čar ataih tin, hmư̆ hing Khua git gai ping gah dêh čar ơi Nguyễn Phú Trọng rơngiă, ƀing khua mua, mơnuih ping gah hăng ană plơi pla să Quảng Trực hning tui biă mă kơ sa čô khua hơmâo pran jua khăp kơ ană plơi pla, lŏn ia, sa gru ba jơlan hlâo hiam klă kơ pran jua hơkrŭ. Anai lĕ tơlơi rơngiă rơngiom prong prin kơ ping gah, kơnuk kơna, mơnuih ƀôn sang ta, biă mă ñu amăng hrơi blan lŏn ia, kơnuk kơna ta hlăk ngă tui khut khăt bruă akŏ pơdong ping gah, pơgăn tơlơi soh sat ƀong kông ngăn, hơmâo pran jua pơtrut mơ̆ng khua git gai ping gah ơi Nguyễn Phú Trọng pô pơphun. Ƀing khua, mơnuih ping gah hăng ană plơi pla djop djuai ania amăng să hơdor glăi na nao kơ tơlơi Khua git gai ping gah pơtă pơtăn, khom thâo gum pơgôp tong ten, ha pran jua đăo kơnang kơ tơlơi git gai mơ̆ng ping gah, kơnuk kơna, ăt gir run man pơdong plơi pla kual guai dêh čar kiăng pơdrong sah kjăp kơtang”.

Ăt kar kăi hăng djop djuai ania amăng đơ đam dêh čar, lơm hmư̆ hing Khua git gai Ping gah dêh čar ơi Nguyễn Phú Trọng rơngiă, neh met wa djuai ania Chăm ƀơi tơring čar Bình Thuận ăt hning rơngŏt biă mă mơn. Ơi Lâm Tấn Bình, mơnuih apăn bruă djuai ania Chăm pơdơi kơtret laih, dŏ ƀơi să Phan Hiệp, tơring glông Bắc Bình, tơring čar Ninh Thuận brơi thâo, mơng hơdôm tơlơi pơhiăp amăng hơdôm mông jơnum pơprong amăng lŏn ia, ñu ăt lăng yôm hơdôm tơlơi git gai mơng Khua git gai Ping gah dêh čar hăng sit biă ñu hơdôm tơlơi pơhiăp bơdjơ̆ nao tơlơi đăo, djuai ania; mơng anun, pơdah pran kơtang mơng tơlơi gum pơgôp djop djuai ania amăng bruă pơđĭ kyar bơwih ƀong huă-mơnuih mơnam amăng lŏn ia ta:

“Lơm hmư̆ hing Khua git gai Ping gah dêh čar ơi Nguyễn Phú Trọng rơngiă, amăng pran jua kâo kah hăng abih bang mơnuih djuai ania Chăm ol kơdol pran jua biă mă. Wa Trọng rơngiă pioh glăi tơlơi hning rơngŏt kơ djop djuai ania dêh čar Việt Nam. Yua lơm dŏ hơdip, ñu tuh rơyuh pran jua, tơlơi thâo thăi brơi kơ lŏn ia, ngă kơ dêh čar Việt Nam pơdrong asah hăng hơđong kjăp. Wa lĕ sa čô khua git gai rơgơi kơhnâo ƀơi Việt Nam, wa rơngiă ăt pioh glăi tơlơi hing ang amăng djop plơi pla ala ƀon”.

Hmư̆ hing ơi Nguyễn Phú Trọng Khua git gai ping gah rơngiă laih sa tơlơi hning tui abih pran jua mơ̆ng djop gưl mơnuih ƀôn sang dêh čar, amăng anun hơmâo ƀing kơhnâo adoh suang, pơčeh tơlơi hơ̆k hơr amăng dêh čar lăi hrŏm, ƀing kơhnâo adoh suang djuai ania Khmer hnun mơ̆n. Ayong Thạch Sroh dŏ ƀơi să Đôn Châu, tơring glông Duyên Hải, tơring čar Trà Vinh, jing ding kơna khul čih pơčeh tơlơi adoh suang hơ̆k hơr tơring čar lăi, ƀing mơnuih thâo adoh suang djuai ania Khmer Trà Vinh thun blan rơgao gir run djă pioh gru grua hiam hăng pơđĭ tui tơlơi thâo adoh suang djuai ania. Kơnong drơi jăn ñu pô, pơ anăp anai ăt gir run djă pioh gru grua hiam djuai ania. Hmư̆ Khua git gai ping gah ơi Nguyễn Phú Trọng rơngiă, pran jua ayong Thạch Sroh hning rơngôt biă mă, ñu lăi:

“Khua git gai ping gah ơi Nguyễn Phú Trọng hiam klă rơgơi kơhnâo biă mă, ñu đing nao kơ bruă pơtrut djă pioh gru grua djuai ania ƀiă Việt Nam lăi hrŏm, boh nik ñu đing nao, pơtô lăi, pơtrut pơsur mơnuih ƀôn sang djuai ƀiă djă pioh gru ama grua amĭ, tơlơi thâo thăi mơ̆ng đưm djuai ania pô. Ră anai, lơ̆m hmư̆ hing Khua git gai ping gah rơngiă laih, kâo hăng mơnuih ƀôn sang Khmer gơmơi rơngôt hning biă mă, rơkâo djă pioh hơdor bơni na nao pran jua ñu pioh kơ mơnuih ƀôn sang gơmơi”.